Astana ákimi sońǵy kezderi qoǵamda qyzý talqylanyp jatqan jolaqyny 200 teńgege deıin kóterý máselesine qatysty túsinikteme berdi, dep jazady Qamshy.kz aqparat agenttigi.

«2014 jyldan beri tarıf baǵalary kóterilgen joq. Ol ýaqyttan beri eki ret devalvasıa boldy. Janarmaı baǵasy kóterilse de, tarıf sol qalpy boldy. Qazirgi ýaqytta avtoparktermen ekonomıkalyq model máselesin talqylap jatyrmyz. Obektıvti baǵa berý úshin bankırlerdi de shaqyrdyq. Máslıhatta sóz bolǵan tarıf mólsheri sýbsıdıany tóleý úshin mańyzdy ekenin túsiný kerek. Avtoparkter 300, 500 teńgege deıin usyndy. Biraq biz 200 teńgege toqtaldyq. Ol eseptik tarıf janarmaı satyp alýdy, júrgizýshiler, kondýktorlardyń aılyǵyn, transportty jóndeý jumystaryn qamtamasyz etý kerek», - dedi elorda ákimi OKQ-de ótken baspasóz máslıhatynda.

Isekeshevtiń aıtýynsha, bul másele aldymen qoǵamdyq keńeste, sarapshylar keńesinde, máslıhatta, keıin ákimdikte talqylanady, tek sodan keıin sheshim qabyldanady.

«Biz bıyl jolaqyny kóterýdi josparlap otyrǵan joqpyz. Tólem kartasy boıynsha qala turǵyndary ádettegideı 90 teńge tóleıdi. Biraq biz saralanǵan tarıfti engizemiz, ol 180 teńge shamasynda bolmaq. Iaǵnı, kartamen tólem jasaǵysy kelmeıtinder qolma-qol aqshamen 180 teńge tóleıtin bolady. Menińshe, tólem kartasyn satyp alyp, sol arqyly esep aıyrysqan yńǵaıly. Qazirgi ýaqytta tólem ofısterin keńeıtý jumysyn júrgizip jatyrmyz. Bári engizilgende shamamen shildeniń ortasyna qaraı ár turǵyn karta satyp alyp, 90 teńgemen júre alady», - deıdi ákim.

Budan buryn, Astanada qoǵamdyq kólikterde saralanǵan tarıf engizý jaıly habarlanǵan. «Astana LRT» JSHS basqarmasynyń ókili Bekmyrza Igenberdınovtiń málimdeýinshe, turǵyndar tólem kartasy arqyly 120 teńge, al qolma-qol aqshamen 200 teńge tóleý kerek.