Jýrnalıs Toqtar Jaqash "Nur Otan" partıasyna zańmen tyıym salýdy usyndy, dep jazady Qamshy.kz aqparat agenttigi. 

— Eshnárse máńgilik emes qoı. Amandyq bolsa, móńkip-týlamaı otyryp-aq osy bıliktiń aýysqanyn da kózben kórermiz. Qansha ýaqyt qalǵanyn bir Qudaı ǵana biledi. Al biz, qazaqtar asyqpaımyz. Kútemiz. Sondyqtan, qarap otyrmaı, jańa bılikke óz usynysymyzdy qazirden bastap jaza bergenimiz jón shyǵar. Mysaly, zańdyq kúshi áldebir mınıstrdiń buıryǵynan kem qazirgi konstıtýsıany sol kúıinde aparyp, panteonǵa, ıesiniń janyna jaıǵastyra salaıyq der edim. Jalpyhalyqtyq talqylaýdan ótken jańa Konstıtýsıa kerek elge. Eshkim qarsy emes shyǵar? Osy kúnge deıin qabyldanǵan búkil zań-aktilerin revızıalaǵan da artyqtyq etpeıdi. Sheteldik ınvestorlarmen jasasqan kelisimder men "Ónimdi bólisý týraly kelisimderdi" halyqqa jarıalaý da kezekti bir dúnıe. "Otarsyzdaný týraly", "Lústrasıa týraly" zańdar birinshi kezekte qabyldansa jaqsy bolar edi. "Lústrasıa" demekshi, búgingi irip-shirigen bıliktiń jandaıshaptary aldaǵy ýaqytta da qoǵamdy tejeýshi kúshke aınalatynyn eskerip, olardy tym alys jerge qarǵybaýlap qoıý kerek. Kadr máselesi de kezek kúttirmes orynda. NEP kezinde Lenın alyp eldiń ekonomıkasyn kóterý úshin býrjýazıanyń oqyǵan kadrlaryn iske jaratty. Bizge onyń túkke de qajeti joq. Oqyǵan, bilimdi, biraq laıyq jumys tappaı ár salada shóptiń basyn bir shalyp júrgen jastarymyz qanshama?! Eldiń áleýetin kóterýdi solardyń qolyna berý kerek.

Saıası bılik ýzýrpasıaǵa túspeıtindeı shyn máninde parlamenttik respýblıka qursaq qoı, shirkin! 
Odan keıin, 28 jyl boıy sóz bostandyǵyn shektep kelgen, naýqan saıyn halyqqa úıip-tógip ýáde berip, onysyn oryndamaıtyn, eldi qaıyrshylyq jaǵdaıǵa jetkizgen, músheleriniń deni jemqorlyqqa batqan "Nur-Otan" partıasyn komýnıstik partıamen teńestirip, zań júzinde tyıym salý kerek dep oılaımyn!, - dep jazdy Feısbýk paraqshasynda Toqtar Jaqash.