Batys Qazaqstan oblysy ákimdiginiń bastamasymen «Azamattarǵa arnalǵan úkimet» memlekettik korporasıasy kórsetiletin qyzmetterdiń proaktıvti ádisi boıynsha pılottyq jobany júzege asyra bastaǵan bolatyn. Aıta ketsek, bul qyzmetti birinshi bolyp bala týǵan ata-analar paıdalanǵan edi. Oraldyq Álıa Kárimova esimdi jas ananyń aıtýynsha, memlekettik qyzmet kórsetýdegi jańa tásildiń tıimdi tustary kóp. Jańa bosanǵan analar «Elektrondy úkimet» portalyna tirkelgen jaǵdaıda barlyq qajetti qujattardy sms-habarlama jiberý arqyly rásimdeı alady. Iaǵnı aqparattyq júıelerdiń birigýiniń arqasynda jańa týǵan azamatty tirkeý boıynsha ótinish avtomatty túrde keletin bolady. Bala ómirge kelisimen onyń ata-anasyna sms-habarlama arqyly quttyqtaý kelip, sábıdi tirkeý boıynsha memlekettik qyzmetti alý usynysy jasalady.
-«Elektrondyq úkimet portaly» barlyq málimetterdi túrli memlekettik organdardyń aqparattyq júıelerinen jınap, al ózge derekterdi sms-habarlama arqyly ata-anadan suraıdy. Buǵan deıin bala týǵannan keıin ata-analar balany tirkeý, kýálik alý, járdemaqy taǵaıyndaý jáne balabaqshaǵa kezekke qoıý úshin halyqqa qyzmet kórsetý ortalyqtaryna barýy tıis bolatyn. Proaktıvti qaǵıdattyń iske qosylýyna baılanysty endi front-ofısterge barýdyń, tipti elektrondyq úkimet portalyna júginýdiń de qajeti joq. Barlyq qajetti qyzmetterdi turǵyndar sms-habarlama arqyly ala alady. Biraq sms-habarlama alý úshin azamattar kez-kelgen HQKO-ǵa baryp, ózderiniń telefon nómirlerin portaldaǵy jeke kabınetterinde bekitýi tıis», – deıdi BQO «Halyqqa qyzmet kórsetý ortalyǵy» departamentiniń dırektory Marat Bassarov.
Osy qyzmettiń kómegin alǵash bolyp paıdalanǵan oraldyq jas anaǵa týý týraly kýálik te tabys etilgen edi. «Bir tereze qaǵıdatyn ómirdiń barlyq salasynda engizý, sıfrlandyrý úderisin odan ári damytý, elektrondy úkimet salasyn jetildirý sıaqty mindetter keshegi elbasy joldaýynda da keńinen kórinis tapty. Bul saıyp kelgende adamdardyń altyn ýaqytyn únemdep, ómir súrý sapasyn arttyra túseri sózsiz», – deıdi mamandar.
