Batys Qazaqstan oblysynyń Syrym aýdanynyń ortalyǵy Jympıty aýylyndaǵy «Atameken – Syrym» aýyl sharýashylyq óndiristik kooperatıviniń modýldi mal soıý pýnkti qarqyndy jumys jasaýda.
Aıta ketsek, modýldi mal soıý pýnkti aýysymyna 10 maldy birdeı qabyldaı alatyn mal soıý alańynan, syıymdylyǵy aýysymyna 4 tonna ónim saqtaý múmkindigi bar tońazytqysh bóliginen jáne veterınarlyq zerthanadan turady. Jobanyń quny 27 mln.teńgeni quraıdy.
- Biz bul nysannyń qurylysy úshin «Aýylsharýashylyǵyn qarjylaı qoldaý qory» AQ arqyly 23 mln.teńge nesıe aldyq. Qalǵan qarajat kooperatıvtiń esebinen tolyqtyryldy. Aýyldaǵy jeke adamdardyń mal bordaqylaý isin damytý maqsatynda 2017 jyly «Bereke» baǵdarlamasy júzege asyryla bastady.Túligin kúılendirip otyrǵan turǵyndar endigi jerde jańa pýnkt arqyly mal soıý men ónimdi saqtaýdyń sapaly qyzmetin tutyna alady.
Sebebi maldy úı jaǵdaıynda, qora-qopsynyń mańynda soıýǵa qazir ruqsat joq. Pýnkt qyzmetiniń baǵasy jalpy halyq úshin 5000 teńge dep belgilendi. Kooperatıv músheleri úshin maldy tasymaldaý men soıý, saqtaý qyzmetterinde jeńildik bolady,- deıdi «Atameken-Syrym» aýyl sharýashylyǵy óndiristik kooperatıviniń jetekshisi Aıdynǵalı Balǵalıev.
Mamandardyń aıtýynsha, pýnkttiń eń basty tıimdiligi – tazalyq. Bul jerde mal etiniń sapasy arnaıy attestasıadan ótken veterınar mamannyń qadaǵalaýynda bolady. Turǵyndar modýldi mal soıý pýnkti arqyly maldyń soıylǵany jónindegi qujatty da esh kedergisiz rásimdeı alady. Veterınar mamannan bólek, kooperatıvte qasapshy jáne qasapshynyń kómekshisi, maldyń ishki qurylysyn qabyldaýshy maman jumys jasaıtyn bolady.
Nysannyń qurylysyn «Akadem STROI» jaýapkershiligi shekteýli seriktestigi júrgizdi. Syrym aýdanyndaǵy mal soıý pýnkti - óńirde iske qosylǵan alǵashqy modýldi pýnktterdiń biri.
