Janymda otyrǵanda jarym, balam, Men nege alaqyzyp jarymdalam? Áldebir joǵym bar aý tabylmaǵan, Áldebir enshim bar aý alynbaǵan?! Qaradaı qońyltaqsyp qulazydym, Qańyrap qara qosym, quba dúzim. Adastym áýeninen bir ánimniń, Quryshyn kim qandyrar qulaǵymnyń?. Asan keshken ómir bul, Qorqyt qashqan, Jerortaǵa kelippiz onsha uqpastan... Sátterimde uıqymdy taltúste ashqan, Josylady joldarym jortyp basqan... Kópten beri júrgeni kóńil masań, Moıynda eken bar qamyt moıyndasań. Ótkelegi ómirdiń jolymda san, Túgendeler eken bir joǵym qashan? 02.01.15 j.  

Kógennen qozy aǵytar, jeliden qulyn, Tórt túliginiń oqyǵan kózinen muńyn, Qutpany keler óristen ózinen buryn, Qart shopan kórsem qaıǵysyn sezinem búgin. Quraqtan sybdyr estilip, bulaqtan syńǵyr, Jubatqan jyldar janyńnan synaptaı syrǵyr... Esime alsam egiltip jylatqan qurǵyr, Jumaqtaı dáýren eken ǵoı, uzatqan bul bir.... Enshimdi alǵan san ǵasyr en jaılaǵanda, Tóldeýlik qaıda? Kúteýlik, Tórjaılaý qaıda? Jetelegenmen janymdy armandar aıǵa, Sol kúnge zar bop qaldym-aý sor qaınaǵanda. Qurt urlamaıdy óreden, qutyńda azaıdy, Qoıshyda kelmes bosaǵa syqyrlamaıdy. Qaraǵaı, qaıyń mosyda shytyrlamaıdy, Tumandy taýsyz qolqany tútin qamaıdy. Atan qomynda ósekemin, asaý jalynda, Osy-aý barymda sol shaqtar, osy aý baǵym da. Tosam jaýynǵa jonymdy, tosam daýylǵa, Bórili qanym týlaıdy qashan qanymda? 05.11.2014j. *** Kelispese kóńildiń kúıi keıde, Kiná taǵyp júremiz dúıim elge. Biri tórge súırelep biri kórge, Súıinem de qoıamyn kúıinem de. Alaqanmen tosqandaı júzin kúnniń, Jaba toqyp jasyram minin kimniń? Áláýláıi áldılep búginginiń, Sózin aıtam sandyraq burynǵynyń. Jylaý kórgen kezim kóp, shydam jeńgen, Shejiresin shertedi jyraý keýdem. Ótip jatqan ómir aı buǵaýlaýmen, Jaýaby joq zymyryp suraýlarmen. Jýyndyńdy ańdyıdy el, jyryndyńdy, Syryń kimdi tolqytar, jyryń kimdi?! Úıim gúldi bolǵanmen, mıym muńly, Ǵumyr qundy bolmady-aý, tıyn ǵurly!!!! 21.12.14 j.