Jaqynda belgili profesor Myrzantaı Jaqyp KTK telearnasyna bergen suhbatynda: "Joǵary oqý ornynda tegin oqý múmkindigi talantty jastarǵa emes, sabaqqa múlde kelmeıtin juldyzdarǵa úlestiriledi", - dep aıdy aspanǵa biraq shyǵardy. Onyń aıtýynsha, sahnadan ǵana kórinetin stýdentterge ustazdar joǵary baǵa qoıýǵa májbúr eken.
Al Gýmılev atyndaǵy EUÝ oqytýshysy, aıtysker aqyn Serikzat Dúısenǵazın «juldyzdar talantty jastardan granttaryn tartyp aldy» degen profesordyń sózine úzildi-kesildi qarsy. Bul týraly aqyn Qamshy.kz aqparat agenttiginiń tilshisine bergen suhbatynda aıtty.
Ýnıversıtette sabaq beretin hám óner juldyzdarymen jaqsy aralasatyn Dúısenǵazın profesor Myrzantaı Jaqyptyń bul áreketin quqyqbuzýshylyqqa balady.
«Grant búkil qazaqstandyqtarǵa ortaq. Qarapaıym adamdarǵa nemese juldyzdarǵa dep bólinbeıdi. Baǵy bar adam ol grantty alady. Sol sebepti dosenttiń aıtqanyn múldem quptamaımyn», - dep ashyǵyn aıtty Dúısenǵazın.
Onyń sózinshe, JOO-da halyqqa qyzmet etip júrgen azamattarǵa jeńildik jasalady. Ol adamnyń mindetti túrde ánshi bolýy shart emes, qazaqtyń týyn kókke kóterip júrgen Olımpıada chempıondary da magıstratýrada oqıdy.
«Mańyzdy sharalar nemese Olımpıadalar shyǵyp qalyp jatsa, «barmaısyń, partada otyr!» dep aıta almaısyń ǵoı», - deıdi Serikzat Dúısenǵazın.
Buǵan qosa, aqyn Myrzantaı Jaqyptyń «ánshiler sabaqqa múldem qatyspaı júrip dıplom alady» degen sózine shúılikti.
«Sabaqqa qatyspaıdy dep aıtatyndaı ol kisiniń dáleli bar ma? Ózim biletin Meırambek Bespaev 100 paıyz bolmasa da, sabaqqa qatysyp júrýge tyrysty. Sebebi mádenıettaný fakúlteti – oǵan kerek sala. Dıplom jumysynyń taqyryby – «Altynbek Qorazbaevtyń qazaq mádenıetindegi orny». Taqyryby boıynsha ózi zertteý jumystaryn júrgizdi, ózi qorǵady. Al qorǵaý kezinde Myrzantaı Jaqyp qatysty ma? Joq. Onda nege qur sóıleıdi? Menińshe, ol kisiniń máselesi ánshide emes. Kimge soqtyǵaryn bilmeı júrgen sekildi. Ne qoǵamǵa, ne bılikke qapaly», - dedi aqyn.
Serikzat Dúısenǵazın magıstratýrada eń kóbi 2-3 tanymal adam ǵana oqıtynyn aıtady. Tipti, jylyna bir-aq juldyz túsetin jaǵdaılar bolady eken. Al mundaǵy ýnıversıtet basshylyǵynyń maqsaty – belgili tulǵalardy jurt kórsin, qorǵaýyna qatyssyn, suraqtaryn qoısyn, Sovet úkimeti kezindegideı bári ashyq ótsin degen nıet.
«Menińshe, munyń esh sókettigi joq. Qazaqstanda «juldyzdar magıstratýrada oqymasyn» degen zań bar ma edi?! Olar da bilim alýǵa quqyly. Erteń ózderi de stýdentterge sabaq berýi úshin jan-jaqty bolýy tıis. Buǵan bola daý shyǵarý orynsyz», - dep qorytyndylady sózin Serikzat Dúısenǵazın.
Aıta keteıik, Myrzantaı Jaqyptyń taqqan aıybyna Meırambek Besbaev ta jaýap bergen bolatyn. Ánshi óziniń birneshe oqý ornyn bitirgenin aıtyp, daýly jaǵdaıǵa «ǵalymnyń ishtarlyǵyn» kinálady.
