Táýelsizdiktiń  alǵashqy   jyldary qandas týystar shekara deıtin túsiniktiń eki jaǵynan jamyrasa kelip tabysyp jatty. Tólqujatpen- aq aı aralap júre beretin TMD sheńberinde turyp jatqan  Alash  urpaqtary  úlken shańyraq astyna jınalýyna    at- kólik  asa boldyra qoımady. Qytaımen Keńes  arasynda kezinde muz qamal bolsa  da,  azattyq jyldary  Qazaqstannyń shyǵysyndaǵy shekaramyz ashylyp,  jarty ǵasyrdan asa  ata-mekenin ańsaǵan qandastyrymyzdyń  áýpirimdep elge  jetýi  de bir ǵanıbet is bolǵan edi. 

    Alaıda, sońǵy  jyldary  bul baılanys  úzilip  barady.  Aradaǵy  kóshi-qonnyń  toqtaǵany  óz  aldyna, endi  ýaqytsha  beriletin  vıza alý da   qıyndaı  túsýde. Qytaımen Qazaqstannyń arasyndaǵy alym- berim, barys- kelistiń arqasynda saıası, saýda, bilim máselelerimen shekara asatyn azamattar kóbeıse de,  jeti- segiz myńnan aspaıtyn Qytaı  vızasy sońǵy jarty jylda 3 esege qymbattap ketti.  Buryndar 7 myń teńgege berilip kelgen ruqsattyń quny bul kúnde 200 dollarǵa jýyqtaıdy. Onyń ózi tek úsh aıdyń ishinde bir ret baryp-kelýge jaraıtyn vıza.Túrli maqsattarǵa saı qazir bir jylǵa deıingi merzimge beriletin ruqsat ta qysqarǵan.  Tipti pasportyńa vıza japsyrtý úshin eń az degende bir aı kútýińe týra keledi. Aptasyna alty- aq saǵat qabyldaıtyn Qytaı konsýlynyń esiginen  qara qulyp ketpeıdi.  Qytaı  jaǵy  vızany  nege  qymbattatyp  jatqany  da  belgisiz.  Naqty sebep  te  joq.  Sonda  arǵy  betke  qazaq  qalaı bettemek?!

    Osy  vıza máselesi  boıynsha  qansha  qandasymyz qysyltaıań  kúıde  júr.  Bir ǵana  mysal,  Qytaı  konsýlyndyǵynda vızanyń álegimen júrgen Máýlen aǵaǵa kezigip qalǵan edik.  Narynqoldyq Máýlen aǵa atasy Qaıshybektiń  baýyry Toıshybek deıtin kisiniń Qytaı jerindegi urpaqtaryn elge ákelý úshin shyr- pyr bolyp júr eken. Aǵamyzdyń   aıtýynsha,  Qaıshybek ómirge  kelmeı turyp eki jasar Toıshybek jıyrmasynshy jyldardaǵy   ashtyq kezinde shekara asyp ketipti. Keıinnen   egemendik alyp, syrtpen baılanys ornaǵaly   ary- beri ótkenderden habar alyp,  etjaqyny Máýlen aǵany taýyp alypty. Shekaranyń ar jaǵyndaǵy baýyrlaryna atasy týǵan topyraqty ıisketýdi paryz sanaǵan Máýlen aǵa:  «Tóken atamnyń urpaqtary bar ekenin estı sala jedel pasport jasatyp, vıza ashtyrýǵa konsýlǵa kelgen edim. Búgin -  tórtinshi kún.  Kúnige  kezekke ilinbeı qalam. «Ohranalar»  sybyrlaıdy:  deldalǵa  para berseńiz, tez bitedi dep.  Munda  sendelip  júrgen jalǵyz men emes,  men sıaqty qanshama adam: jas bala kótergen analar da, býyny bosaǵan kári kisiler de júr.  Solardy aıaısyń!   Bárimiz  deldalǵa para  bersek,  konsýl nege kerek, zań qaıda qalady?!- dep ashýlandy  qarıa.    

   Túıin: Osyndaı  jaǵdaılardyń kúási  bolyp,  ishteı  nalymasqa  amalyń  qalmaıdy!  Ata -jurtyn ańsap, elge kelsek deıtin qandastarymyzdyń  Qytaı jerinde qujat máselesimen sandalǵany da jeter. Almatynyń tórinde aspan asty eli atynan pátýa jasaıtyn  qysyq kózder tarylǵan nıetin keńeıitkeni durys- aý... Vızanyń qymbattaýy joıylyp, deldaldarǵa tosqaýyl salynsa, Qytaı konsýly esigindegi qara qulyp kóbirek ashyq tursa eken degen tilek bizdiki.

Nurǵalı Nurtaı

"