Almaty qalasyndaǵy №6 kitaphanada kórnekti aqyn, halyqaralyq «Alash» ádebı syılyǵynyń laýreaty, «Qurmet» ordeniniń ıegeri, «Juldyz» jýrnalynyń bas redaktory Ǵalym Jaılybaımen Astananyń 20 jyldyǵyna oraı kezdesý ótti. Jıyndy Almaty qalasy İshki saıasat basqarmasynyń tapsyrysymen «El-shejire» qoǵamdyq qory uıymdastyrdy.
Kezdesýde qalamger jas qalanyń alyp qalaǵa aınalyp, elimizdiń kórkeıip, damýyna qosqan úlesin baıandady. Sondaı-aq, burynǵy bolmysy men búgingi etnıkalyq kelbetin sıpattap, qala tarıhyna sholý jasady. Ol óziniń kóptegen án-jyryna Astananyń arqaý bolǵanyn aıtty. «Esil aǵady» áni men «Tama kóshken» «Qara oramal» poemalarynyń avtory kezdesýdiń basyn Elorda jaıynda jazylǵan rýhty óleńimen ashty. Jasampazdyqty jalaý etken jas qalanyń sáýlet qurylysy kózdiń jaýyn alyp, záýlim ǵımarattar jarysa boı kóterip jatqanyn keńinen tarqatty. Buǵan qosa, Alataýdan Arqaǵa kóshirilgen kóptegen mekemeler men ǵylymı oshaqtardyń búginde nyq ornyqqanyn, murajaı men muraǵattardyń murty buzylmaǵany jaıynda áńgimelep berdi.
Ol «Saryarqa tósindegi Astana – tamasha jetistikter men jeńisterge toly XXI ǵasyr ǵajaıyby, álemdik megapolıs, arman qala retinde boı kóterdi. Elimizdiń táýelsizdigi men egemendigin pash etken memlekettik ortalyq bolyp tanyldy. Bul ultymyzdyń qaýipsizdigin, geosaıası erkindigin, terıtorıasynyń myzǵymastaı beriktigin, el ekonomıkasynyń qarqyndy damý strategıasyn qamtamasyz etetin jańashyldyqqa betburys kezeńi deýge bolady. Al jas qalanyń mereıli toıy qazaq jurty úshin qashan da uly mereke», – dedi. Osyǵan oraı Ǵalym Jaılybaı bul merekeniń azattyǵymyzdy ardaqtap, astanamyzdy ulyqtaıtyn shýaqty kún ekenin erekshe atap ótti.
