Astana qalasynyń ákimdiginde shahardaǵy múmkindigi shekteýli jandarǵa arnalǵan áleýmettik ınfraqurylym nysandarynyń qoljetimdiligin talqylaǵan arnaıy jıyn ótti. Oǵan «Nur Otan» partıasy Tóraǵasynyń Birinshi orynbasary Máýlen Áshimbaev, qala basshysy, partıanyń Astana qalalyq fılıalynyń tóraǵasy Áset Isekeshev jáne úkimettik emes uıym ókilderi qatysty.
Jıyn barysynda sóz sóılegen Partıa Tóraǵasynyń Birinshi orynbasary «Kedergisiz keleshek» jobasyn júzege asyrýda tórt baǵyt boıynsha jumys jasalatynyn tilge tıek etti.
Búginde partıa qyzmetin jańǵyrtý aıasynda elimizdegi jetekshi saıası kúshtiń «Kedergisiz keleshek» partıalyq jobasyn qaıta jandandyryp, osy salada belsendi áreket etip jatqany málim. Jobanyń maqsaty – elimizdegi barlyq múmkindigi shekteýli jandardyń ómir súrý sapasyn jaqsartý bolyp tabylady. Máýlen Áshimbaevtyń aıtýynsha, partıa qur statısıka úshin emes, múmkindigi shekteýli jandarǵa naqty kómek kórsetý úshin jobany júzege asyrýda tórt baǵytqa erekshe basymdyq beretin bolady.
– Partıa qyzmetin jańǵyrtý aıasynda múmkindigi shekteýli jandardyń ómir súrý sapasyn jaqsartýǵa baǵyttalǵan «Kedergisiz keleshek» partıalyq jobasyn odan ári jandandyryp, tıimdiligin arttyrýdy qolǵa aldyq. Sol arqyly erekshe qajettilikti talap etetin azamattarǵa naqty kómek kórsetýge basymdyq berip otyrmyz. Bul jobany júzege asyrý barysynda biz naqty tórt basymdyqty anyqtadyq. Birinshiden, múmkindigi shekteýli jandarǵa arnalǵan kedergisiz orta qalyptastyrý. Ekinshiden, olardyń ınklúzıvti bilim alýlaryna yqpal etý. Úshinshiden, jumysqa ornalasýlaryna qoldaý kórsetý. Tórtinshiden, osy salaǵa qatysty zańnamalardy odan ári jetildirý, – dedi partıa Tóraǵasynyń Birinshi orynbasary.
Sondaı-aq ol Elbasynyń aldymyzǵa eń damyǵan 30 eldiń qataryna qosylýdy basty mindet etip qoıǵanyna nazar aýdaryp, mundaı maqsatqa qol jetkizý tek ekonomıkamen ǵana ólshenbeıtinine toqtaldy. Tıimdi áleýmettik máselelerdiń ońtaıly sheshilýi de bul máselede basty talaptardyń biri bolyp sanalatynyn tilge tıek etip, bul jumystarda Astana elimizdiń ózge óńirlerine úlgi bolýy tıistigin atap ótti.
Óz kezeginde Astana qalasynyń ákimi Áset Isekeshev osy baǵytta elordada atqarylyp jatqan jumystar jaıyn baıandap berdi. Sondaı-aq Eńbek jáne halyqty áleýmettik qorǵaý mınıstrligi Eńbek komıteti, áleýmettik qorǵaý jáne kóshi-qon departamenti basshysynyń orynbasary Sáýle Egembaeva men Astana qalasynyń Sáýlet, qala qurylysy jáne jer qatynastary basqarmasynyń basshysy Baqtybaı Taıtalıev te kóterilgen másele boıynsha istelgen jumystarǵa toqtaldy.
Budan basqa, jıyn barysynda «Qazaqstan múgedekter konfederasıasynyń» atqarýshy dırektory Mádına Ibragımova, «DOS» táýelsiz ómir» múgedekter ortalyǵy qoǵamdyq birlestiginiń atqarýshy dırektory Qarlyǵash Tanabekova, «ELAMAN» áleýmettik ınovasıalyq jobalar qorynyń tóraǵasy Almaz Erjan jáne taǵy basqa belsendi azamattar sóz alyp, óz oılarymen bólisti.
