Óńirlik kezeńniń jeńimpazdary 31 shildege deıin anyqtalady. Budan soń úzdikterdiń úzdigi respýblıkalyq synda belgili bolady.

Almaty qalasynyń ákimdigi men “Nur Otan” partıasynyń aýmaqtyq fılıaly “Qazaqstannyń úzdik áleýmettik jobalary” baıqaýyn uıymdastyrýǵa bıyl da atsalysty. Maqsat – “Prezıdenttiń bes áleýmettik bastamasy” atty úndeýde aıtylǵan mindetterdi iske asyrý, múmkindigi shekteýli jastar quqyǵyn qorǵaý jáne olardyń ómir súrý deńgeıin jaqsartý.

Baıqaý 20 sáýirde jarıalanyp, 30 maýsymda ótinish qabyldaý aıaqtaldy. Onyń shartymen “Nur Otan” partıasynyń, QR Eńbek jáne halyqty áleýmettik qorǵaý mınıstrliginiń, Astana jáne Almaty qalalary men oblystar ákimdikteriniń resmı saıtynan tanysýǵa bolady.

Aldymen baıqaýdyń aýmaqtyq irikteý syny ótti, odan iriktelgender óńirlik baıqaýǵa qatysady. Óńirlik kezeńniń jeńimpazdary 31 shildege deıin anyqtalady. Budan soń úzdikterdiń úzdigi respýblıkalyq synda belgili bolady.

“Qazaqstannyń úzdik áleýmettik jobalary” baıqaýynyń irikteý kezeńine almatylyqtar aıryqsha belsene qatysty. Barlyǵy – 13 joba. İrikteý kezeńinde qatysýshylar áleýmettik jobalarymen tanystyryp, beınerolıkter kórsetti. Qatysýshylardyń eńbegin “Nur Otan” partıasy Almaty qalalyq fılıalynyń, memlekettik organdardyń, úkimettik emes uıymdardyń, Kásipkerler palatasynyń, qala ákimdiginiń ókilderinen turatyn konkýrstyq komısıa baǵalady. Endi alǵashqy synnan ótken úkimettik emes uıymdar, qoǵamdyq birlestikter, múgedekter uıymdary, halyqty áleýmettik qorǵaý júıesin damytýǵa baǵyttalǵan basqa da mekemeler jeńimpaz atanýdan úmitti.

Áleýmettik jobalardy júzege asyrý arqyly ómirde qıyn jaǵdaıda qalǵan 250 myńnan astam adamǵa járdem kórsetiledi. Qazir kezde baıqaýǵa respýblıka boıynsha 312 joba qatysyp jatyr.

Eńbek jáne halyqty áleýmettik qorǵaý mınıstrligi baıqaý jeńimpazdaryna jobalardy iske asyrý úshin aqshalaı sertıfıkattar tabys etedi.