Depýtat Qaırat Qudaıbergen Ortalyq balalar aýrýhanasyndaǵy dárigerlerdiń aıtqanyn teriske shyǵardy.
Aǵash túbinen tósenishke oraýly kúıde tabylǵan balaǵa qatysty keshe Almaty qalasynda baspasóz máslıhaty ótken bolatyn. Onda qatysqa Ortalyq balalar aýrýhanasynyń bas dárigeri «Kómektesemin degen Qaırat Qudaıbergen eshteńe de istegen joq» dep málimdegen.
Tipti densaýlyq saqtaý basqarmasy basshysynyń orynbasary Nurjan Isabekov te bas dárigerdiń sózin rastap, depýtattyń zardap shekken bes jasar bala úshin saýsaǵynyń ushyn da qımyldatpaǵanyn aıtty.
Alaıda Qaırat Qudaıbergen holanews.kz tilshilerine balanyń otbasyna qalaı kómekteskenin táptishtep aıtyp berdi.
«Oqıǵa jaıly áleýmettik jeliden bildim. Ákesiniń nómirin taýyp, birden baılanysqa shyqtym. Tańǵa jýyq Muhammedtiń ákesi ekeýmiz bas dárigerge bardyq. Onyń nege ondaı sózderdi aıtqanyn túsine almaı turmyn. Men aýrýhanaǵa barmaıynsha, bas dáriger balanyń ata-anasyn tipti qabyldamaǵan. Dárigerge ózim kirip, jaǵdaıdy túsindirýin talap ettim. Ol eshkimniń kelmegenin, habarlaspaǵanyn aıtty. Al men ol kisilerdiń tańnan beri aýrýhanada ekenin túsindirdim. Sóıtip bas dárigerdi balanyń ata-anasyna ertip apardym. Bul máseleni bárimiz birge talqyladyq. Dáriger basqasha saıraı bastady. Bala úshin qoldarynan kelgeniniń bárin istep jatqanyn aıtty. Al menen bul aqparatty taratpaýyn ótindi. Sebebi balanyń jaǵdaıy 50-de 50 bolyp turǵan edi. Eger balaǵa bir jaǵdaı bolyp qalsa, bas dáriger jaýapkershilikti moınyna alǵysy kelmedi. Mine, osyndaı áńgime boldy», - dep túsindirdi depýtat.
«Keıin qajetti qarajattyń bárin ózim tólep beretinimdi aıttym. Biraq dáriger balanyń tegin emdelip jatqanyn aıtty. Anasyna balasyn kórsetýin de suradym, ruqsat etpedi. Kelesi kúnitipti tutqasyn kótermedi. Anasyn 17 saǵattan soń kirgizetin boldy. Balanyń jaǵdaıy qalpyna kele bastaǵan sekildi boldy. Biraq dáriger ony aıtqysy kelmedi, sebebi balaǵa birnárse bolyp qalýy ǵajap emes edi. Baqsa da dárigerler, hırýrgter qoldarynan kelgenin jasap jatty, ony óz kózimmen kórdim.
Birneshe kún ótkennen keıin «taǵy ne isteı alamyz?» dep suradym. Tipti ákesinen balany jeke palataǵa aýystyrýdy suradym. Aqshasyn ózim tóleıtinimdi aıttym. Keıin kómekshimdi jiberip, balany jeke palataǵa aýystyrdyq. Ol úshin 86 myń teńge tóledik. Anasy balasyn jıi kórip turǵanyn qaladyq. Tipti barlyq emin ózimiz tólegimiz keldi. Alaıda tek aqyly bólimdi ǵana tóleý kerek eken. Keıin dáriger súıegin qalpyna keltirý kerektigin aıtty. Men bar shyǵyndy óz moınym almaqshy boldym. Bizdiń «Transformator» atty klýbymyz balany qoldaýǵa daıyn edi. Biraq dárigerler aqshany qabyldamapty. Medbıkeler bar aqshany ákesine qaıtarǵanyn estidim. Al men bir tıynyn da alǵan joqpyn. Tipti ózim aýrýhanaǵa barmasam da, ákesi Muratpen baılanysta boldyq. Al dárigerler jýrnalıserdi jınap alyp, meni kómektespedi dep aıtqan. Shyny kerek, tańyrqap qaldym», - dedi Qaırat Qudaıbergen.
Óz kezeginde Muhammedtiń ákesi de Qaırat Qudaıbrgeninń kómekteskenin jetkizdi. Áıeliniń nege olaı degenin Murattyń ózi túsinbeı dal. Aıtýynsha, depýtattyń ózi kelmese de kómekshilerin jiberip turady. Al Qudaıbergenniń ózi qala syrtynda júrgen kórinedi. Tipti Instagram-daǵy paraqshasyna salǵan sýretti de Qaırat Qudaıbergenniń kómekshileri túsirip, oǵan jibergen eken.
