Almatyda elimizdiń júregi Astananyń damýyna úles qosqandar marapattaldy. Qala ákimi Baýyrjan Baıbek aıanbaı eńbek etip, Elordany gúldendirýge belsene at salysqandarǵa mereıtoılyq medaldar tabystady. Bas qalanyń 20 jyldyq mereıli mezeti qarsańynda túrli saladaǵy jandar marapatqa ıe boldy. Jınalǵan almatylyqtar Astana merekesi barsha halyq birge atap ótetin uly meıram dedi. Sebebi, bul tutas eldiń qýanyshy.

Bul Elordanyń eńsesin tiktep, damýyna úles qosqandardyń eńbegi elengen tarıhı kún. Búgin Astanany damytýǵa úles qosqan 270-ten asa almatylyq prezıdent jarlyǵymen mereıtoılyq medaldarǵa ıe boldy. Óıtkeni, olar elimiz táýelsizdik alǵannan beri tynbaı eńbek etip, el abyroıyn asqaqtatyp, mereıin asyrǵandar. Onyń qatarynda eńbek sińirgen qoǵam qaıratkerleri, ǵylym men bilim, óner men sport salalarynyń maıtalmandary, memlekettik qyzmetkerler bar. Qala basshysy Baýyrjan Baıbek ult maqtanyshy, baǵanaly basty ordamyzdyń 20 jyldyǵymen barsha jurtty quttyqtady.  

«Ótken dúısenbide memleket basshysy Nursultan Ábishuly Nazarbaev barlyq ákimderdi Astanada jınap, búgingi táýelsizdigimizdiń tuǵyry Astananyń 20 jyldyq mereıtoıymen sizderdi quttyqtaýdy tapsyrdy. Elbasy «Astana búkil Qazaqstannyń jetistigi. Biz bas qalany búkil el bolyp turǵyzdyq. 21-shi ǵasyrda ǵalamat dúnıeni birge jasadyq. Azamat tarıhynda mundaı qalalar eshqashan 20 jyldyń ishinde salynbaǵan. Al, biz saldyq» dep atap ótti. Eńseli Elordamyzdyń toıy barshamyzǵa qutty bolsyn! Erke Esildiń jaǵasyndaǵy aıshyqty Astana tuǵyrly da ǵumyrly, shoqtyǵy árdaıym bıik bolsyn!», - dedi Almaty qalasynyń ákimi Baýyrjan Baıbek.

1998-shi jyldyń maýsym aıynda Elbasynyń salıqaly sheshimimen Arqa tórinde Astana boı kóterdi. Resmı tusaýkeseri ótip, tórtkúl dúnıege táýelsiz Qazaqstannyń Elordasy tanystyryldy. Búginde bas qala sáýleti men dáýleti kelisken ozyq meken, tańǵajaıyp shahar. Al, dúnıejúzin beıbit kelisimge shaqyrǵan, ǵalamdyq ıgi bastamalardyń kıeli ordasy sanalatyn Astana kóptegen aqynnyń jyryna, ánshininiń ásem ánine arqaý bolǵan.

Kúlli álemge el ataǵyn asqaqtatyp, mańdaı termen mereıtoılyq medaldarǵa ıe bolǵandar eńbekterin elegeni úshin Elbasyǵa shyn alǵys bildirdi.

«Men ózim Táýelsizdik alǵannan bastap, Astanaǵa kóshkennen bastap júzdegen óleń jazylǵan edi. 10 shaqty án óleń jazylǵan. Sonyń biri osy ótken jyly tusaýkeser toıy boldy. Biz qashanda aqyn retinde barǵanda árdaıym óleń jazyp qaıtamyz. Barǵan saıyn bir óleń jazyp qaıtamyz. Óıtkeni, barǵan saıyn bir ózgeris, barǵan saıyn bir dúnıe, barǵan saıyn bir ǵajaıyp», - dedi aqyn, Qazaqstannyń eńbek sińirgen qaıratkeri Shómishbaı Sarıev.

«Men qıyn kezeńderde Sovet odaǵynda 15 respýblıkanyń ishinen qazaq jastarynyń arasynan jańa palýan retinde Olımpıada chempıony bolǵanyma óte rızamyn. Qazirgi jastarda arman bar ma?! Ózimizdiń týymyzdy, ózimiz egemendi el, jeke memleket bolyp baryp, Olımpıada oıyndaryna, álem birinshilikterine qatysa beremiz. Úlken jeńildik emes pe? Sony shirkin, jastar túsinse deımin», - dedi olımpıada chempıony, Qazaqstannyń eńbek eri Jaqsylyq Úshkempirov.  

El júregi Astananyń 20 jyldyǵyn kúlli jurt erteń dúrildetip toılatady. Óıtkeni, bul qala kóptiń tilegimen tiregi qalanǵan, maqtanyshqa aınalǵan meken.