Almaty tártip saqshylary zańsyz saýda núktelerin anyqtaý úshin qaladaǵy iri avtobazarlaryna reıdke shyqty.
Búgin tańerteń «Jibek Joly» avtobazaryna tártip saqshylary reıd jasady. Bazardy polıseıler men Ulttyq gvardıanyń áskerı qyzmetshileri qorshaýǵa alyp, onyń aýmaǵyna eshqandaı kólikti kirgizbedi. Áskerıler bazar aýmaǵynan shyqqysy kelgen ár kólikti egjeı-tegjeıli tekserip shyqty. Sondaı-aq, mundaı reıd qaladaǵy eki bazarda birýaqytta júrgizildi. Reıdke 2 myń adam jumyldyryldy.
«25 shildede qaladaǵy qylmystyq jaǵdaılardyń qalpyna keltirý úshin Almatyda jedel profılaktıkalyq sharalar ótti. Bazardaǵy saýdager de satyp alýshy da tekserýden ótkizildi. Basqa memleketten kelgenderdiń jeke basyna qatysty tekserý jumystaryn júrgizdik. Kóshi-qon týraly zańnamany buzǵan tulǵalarǵa qatysty ákimshilik jaza qoldanylady. Olardyń basqa qylmystarǵa qatystylyǵy tekserilip jatyr. Jalpy jumys 29 shildege deıin jalǵasatyn boldy», - dedi qalalyq İİD resmı ókili Saltanat Ázirbek.
Sonymen qatar, avtobólshekter satatyn satýshylardyń saýda júrgizýge lısenzıasy tekserilip jatyr. Saýdagerler urlanǵan zattardy satpaıtyndaryn aıtty. Olardyń aıtýynsha avobólshekterdi dál osy kúıinde qoımadan aldyrady eken.
«Nissan-nyń eki aınasy bar. Men olardy qoımadan aldyrdym. Urlanǵan aınalardy usynatyndar bar, óz basym almaımyn»,-dedi bazar saýdageri.
Bazar basshysy Aǵzam Ibragımovtyń sózine qaraǵanda, saýdagerler urlanǵan zattardy satqan kúnde olarmen aradaǵy kelisim shart buzylady.
«Urlanǵan bólshekterdi satyp alýshylardy ustaǵan jaǵdaıda, olarmen kelisimshartty buzamyz. Ótken jyldan bastap osyndaı ereje saqtalǵan. Aınalamyz tolǵan urlyq-qarlyq. Meniń de aınamdy bireýler urlap ketken»,-dedi Aǵzam Ibragımov.
Almaty polısıasy reıd jumystaryn 29 shildede qorytyndylamaq. Alaıda, qazirdiń ózinde aralyq qorytyndy nátıjeleri bar.
Satýshylardyń kópshliginde taýardyń zańdylyǵyn rastaıtyn qujat joq. Olar muny saýda núktesiniń qojaıynynyń joqtyǵymen túsindiredi.
Sondaı-aq, reıd barysynda kámeletke tolmaǵan balalar jumys jasaıtyn birqatar saýda orny anyqtaldy.
Endi olardyń ata-analaryna qatysty ákimshilik hattama toltyrylatyn bolady.
Reıd kezinde jýrnalıserdiń kózinshe kóligine esirtki jasyrǵan er adam ustaldy. Belgili bolǵandaı, ol polısıanyń kúdigin týǵyzǵan.
