Búgin Almatydaǵy Qoǵamdyq keńes alańynda qoǵamdyq qaýipsizdikti qamtamasyz etý boıynsha tyńdalym ótti. Oǵan qala belsendileri, úkimettik emes uıymdar men qala turǵyndary qatysty.

Qoǵamdyq keńes músheleri qalalyq ishki ister departamenti jumysyn jetildirý boıynsha azamattardan túsken birqatar naqty sharalar men usynystardy jarıalady.

«Jurtshylyq tarapynan ártúrli baǵyttaǵy kóptegen usynystar kelip tústi. Mysaly, 102 koll-ortalyǵynyń jumysyn jaqsartý qajet. Osy ortalyqtyń shtatyn ulǵaıtý kerek, sebebi adamdar kóbine habarlasa almaı jatady. Budan bólek, qala turǵyndary probasıa júıesinde raqymshylyq jasalǵan sottalýshylardy saýyqtyrý jáne beıimdelý jaǵdaıyna alańdaýshylyq bildirýde. Qalalyq İİD jáne aýdandyq AİİB basshylary úshin KPI engizý qajettigi belsendi túrde talqylandy. Sondaı-aq, jalaqy tóleý, bilikti kadrlar irikteý máseleleri kóterildi», - dep bólisti usynystarmen qoǵamdyq keńes tóraǵasy Rahman Alshanov.

Óz kezeginde, Qoǵamdyq keńes múshesi Marat Shıbutov qala turǵyndary men polısıanyń  usaq quqyq buzýshylyqtarǵa tózimsizdigi máselesin kóterdi.

«Qala turǵyndary áleýmettik jelide usaq quqyq buzýshylyqtardyń ashylmaı qala beretinin atap ótti. Osyǵan baılanysty adamdardyń polısıaǵa degen senimi joǵalyp barady. Eger polısıa urlanǵan káriz qaqpaǵy nemese telefondy taba almasa, iri tonaýshylyq nemese qaraqshylyq qylmysty asha alar ma eken? Sondyqtan, polısıa osyǵan mán bergeni jón», - dedi Shıbýtov.

Tyńdalym qorytyndysy boıynsha, Qoǵamdyq keńes barlyq aıtylǵan usynystardy Úkimet pen Parlamentke zań tártibimen jiberedi.