Sh.Aımanov atyndaǵy «Qazaqfılm» AQ túsirgen qysqametrli «Asan» fılmi 2018 jyldyń qyrkúıektiń 4 men 6 aralyǵynda ótetin H Halyqaralyq Qazan kınofestıvaliniń konkýrstyq baǵdarlamasyna enip otyr dep habarlaıdy Qamshy.kz aqparat agenttigi "Qazaqfılm" baspasóz qyzmetine silteme jasaı otyryp.

Atalǵan jastar kınosy festıvali halyqaralyq statýsy bar Qazan musylman kınosy kınofestıvali aıasynda ótedi. Onda kórkem, derekti jáne anımasıalyq fılmder baq synaıdy. Festıváldiń quryltaıshysy Tatarstan Respýblıkasynyń Mádenıet mınıstrligi. Uıymdastyrýshylar quramy ádettegideı Qazan memlekettik mádenıet ınstıtýty men Tatarstan kınematografıster Keńesinen turady.

Rejıser Berik Jahanovtyń «Asan» kartınasy ákesin kópten beri kórmegen, alaıda qazasyna jolǵa shyqqan jetkinshek týraly sóz etedi.

«Fılmim kınofestıvalge qatysyp jatqanyna qýanyp otyrmyn. Budan da basqa jetistikterge qol jetkizemin dep úmittenemin», - dedi fılmniń rejıseri Berik Jahanov.

Esterińizge sala keteıik, «Asan» fılmi bıyl 71-shi  Kann Halyqaralyq kınofestıvali aıasynda ótetin, álemniń túkpir-túkpirinen jınalǵan qysqametrli fılmderge arnalǵan  Short  Film  Corner baǵdarlamasynda kórsetilgen.

Sonymen qatar, H Halyqaralyq Qazan kınofestıvaliniń baıqaýdan tys baǵdarlamasynda Sh.Aımanov atyndaǵy «Qazaqfılm» kınostýdıasy óndirgen – rejıser Adaı Ábildınovtiń  «Kúltegin» jáne rejıserler – Turdybek Maıdan men Tilek Tóleýǵazynyń «Muzbalaq» atty tolyqmetrli anımasıalyq fılmderiniń kórsetilimi ótetini belgili boldy.