Abaı aýdanynyń ortalyǵy – Qaraýylda oıshyl, ǵulama, aqyn Shákárim Qudaıberdiulynyń 160 jyldyq mereıtoıy atalyp ótti. Mereke aıasynda Shákárimniń Uly ustazy Abaıǵa eskertkish qoıylyp, jańa sporttyq nysan ashyldy. Toıda ata saltqa sáıkes as berilip, túrli ulttyq oıyndardan jarys uıymdastyryldy.
-Búgin Shákárimniń 160 jyldyq uly toıynda Abaıǵa eskertkish qoıylýy - bárimiz úshin ortaq qýanysh, babamyzǵa kórsetilgen qurmet, ári tarıhı oqıǵa, - dep ashylý saltanatynda sóz alǵan oblys ákimi Danıal Ahmetov eskertkishtiń mańyzdylyǵyn atap ótti.
Qoladan quıylǵan eskertkishtiń avtory – jas músinshi, abaılyq Nurbol Qalıev. Eskertkishtiń ashylý saltanatyna Abaı Qunanbaıulynyń urpaǵy Manataı Baltaqaıuly arnaıy shyqyrylǵanyn aıta ketý kerek. Sonymen qatar, saltanatty is-sharaǵa Shyǵys Qazaqstan oblysynyń ákimi Danıal Ahmetov, Astanadaǵy L.Gýmılev atyndaǵy Eýrazıa ulttyq ýnıversıtetiniń rektory Erlan Sydyqov, qoǵam qaıratkeri Hafız Mataev, jazýshy Medeý Sárseke, Talǵat Keńesbaev, ánshi Kenjeǵalı Myrjyqbaı, dástúrli ánshi Gúlmıra Sarına bastaǵan qurmetti qonaqtar qatysty.
Budan keıin jınalǵan qaýym Shákárim eskertkishine arnaıy baryp taǵzym etti. Toıǵa kelgen qurmetti qonaqtar Shákárim baba eskertkishine gúl shoqtaryn qoıdy. Al aýdandyq kitaphana qory "Rýhanı jańǵyrý" baǵdarlamasy aıasynda "Abaı álemi" serıasymen jaryq kórgen Abaı, Shákárim, Muhtar shyǵarmalary jáne Ámire Qashaýbaev týraly ǵumyrnamalyq eńbektermen tolyqty. Bul qundy syı aımaq basshysynyń tartýy. Mereke aıasynda zaman talabyna saı salynǵan jabyq baseınniń ashylý saltanaty da boldy. Baseın kúnine 40 adamǵa qyzmet kórsete alady. Bes jolaqty baseınniń uzyndyǵy - 25, eni – 8,5 metr.
Kemeńger Shákárim babamyzdyń 160 jyldyq mereıtoıy Qaraýyl tóbede, kıiz úıler qalashyǵynda jalǵasty. Shákárim Qudaıberdiulynyń rýhyna baǵyshtalyp quran-qatym túsirildi, alys-jaqynnan kelgen meımandarǵa as berildi.
Budan soń Qaraýyl tóbedegi is-sharalar ulttyq sport oıyndaryna ulasty. Jorǵa jarys, taı jarys, alaman báıge uıymdastyryldy, «Túıe palýan» anyqtaldy. Keshkisin ortalyq stadıonda «Qalamqas» halyq án-bı ansambli merekelik gala-konsert usyndy.
