Memleket basshysy Qurban aıt kúlli musylman qaýymyn beıbitshilik pen tatýlyqqa, ózara túsinistikke shaqyratyn qasıetti meıram ekenin atap ótti dep jazady Qamshy.kz aqparat agenttigi. 

"Qurmetti otandastar! Barshańyzdy qasterli Qurban aıt merekesimen shyn júrekten quttyqtaımyn! Qurban aıt – ıslamdy jaqsylyqtyń, jasampazdyq pen úılesimdiktiń dini ekenin pash etip, kúlli musylman qaýymyn beıbitshilik pen tatýlyqqa, ózara túsinistikke shaqyratyn qasıetti meıram. Sondaı-aq, ol – dinı mereke ǵana emes, barsha adamzatty bir-birine kómek qolyn sozýǵa úndep, baýyrmaldyqqa baýlıtyn úlken rýhanı qundylyq", — dedi memleket basshysy. 

Nursultan Nazarbaev atap ótkendeı, bul kúnderi adamdar jaqyndaryna aq tilekterin arnap, ıgi ister jasaýǵa umtylady. Qurban aıt alýan túrli konfesıalar men etnos ókilderi turatyn Qazaqstanda azamattardyń boıyna izgilik nárin seýip, olardyń ustanatyn dini men ultyna qaramastan, bir-birin qadirleı bilýge zor yqpal etedi. Sondaı-aq, rýhanı tutastyǵymyzdy nyǵaıtyp, birligimizdi bekite túsedi.

Tamyz aıynda qazaqstandyqtar on kún demalady 

"Osynaý jarqyn merekede árbir shańyraqqa baqyt, beıbit ómir men bereke-birlik tileımin! Qasıetti meıramda shalǵan qurbandyqtaryńyz ben izgi nıetterińiz saýaptan jazylsyn! Aıt qabyl bolsyn!", — dep  túıindegen Elbasy.