Áset Isekeshev kóptegen jumystyń qolǵa alynyp, birneshe jylda qalany sý basýǵa qatysty máselelerdiń tolyqtaı sheshiletinin jetkizdi. Sondaı-aq, ol osy máselege qatysty Baqytjan Saǵyntaevqa usynys aıtty, dep habarlaıdy Qamshy.kz aqparat agenttigi Sputnik Qazaqstanǵa silteme jasaı otyryp.
"2016 jylǵy Elbasynyń úshjyldyq tapsyrmasyna sáıkes, qubyr júıesi jóndelip jatyr. Qazir bólingen qarajat esebinen 2019 jyly júıeni tolyqtaı ózgertýdi josparlap otyrmyz. Ákimdik óte úlken jumys atqardy. Byltyr Turan — Uly Dala, 31 kóshe, Kóktal kenti, Myńjyldyq saıajoly, S. Seıfýllın kósheleriniń tazartý qurylystaryn aıaqtadyq. Tazartylǵan sýlardy Esil Beısekova — Qorǵaljyn tas joly-Prıgorodnyıǵa aǵyzý úshin 15 shaqyrym kolektordy buratyn Turan-Syǵanaq tazartý qurylǵylarynyń rekonstrýksıasy bir jyl ishinde jedel qarqynmen aıaqtaldy", — dedi Astana ákimi úkimet otyrysy barysynda.
Sondaı-aq, Áset Isekeshev Astanada jaýyn-shashyn sýyn kárizge buryp otyrý jumystaryn baqylaıtyn kásiporyn qurý josparda bar ekenin aıtty. Kásiporyndy "Astana Tazalyq" negizinde qurý kózdelgen.
"Sýaǵar júıesiniń jumysyn eki esege arttyrýǵa kómektesetin tehnıkalyq múmkindikter bar. 2019 jyly olar tolyqtaı júzege asyrylady. Qarajat bólinip qoıǵandyqtan shuǵyl jumystar júrgizilip jatyr. Osy úsh jylda negizgi máseleler sheshiletin bolady. Keshe qala turǵyndaryn, rasymen, jaısyz jaǵdaıǵa qaldyrǵan máselege kelsem, Qazgıdromet málimeti boıynsha, 1,5 táýlikte jaýyn-shashyn mólsheri 45 mıllımetrge deıin jetken. Al bir aıda norma boıynsha 29 mıllımetr túsýi tıis. Bul bir aılyq normadan bir jarym esege kóp bolyp otyr", — dep aqtaldy Áset Isekeshev.
Ári qaraı qala ákimi premer-mınıstrge usynys aıtyp, onyń bul máseleni jýyq arada sheshýge kómektesetinine toqtaldy.
"Baqytjan Ábdiruly, qazir tabıǵı monopolıalar týraly zańda sýaǵarlar qyzmetiniń baǵasy belgilenbegen. Biz "Astana Tazalyq" bazasynda sý aǵatyn kanalızasıa júıesin baqylaýda ustap otyratyn kásiporyn qurýdy josparlap otyrmyz. Mınıstrlikke tapsyrma berseńiz, biz bárin júzege asyratyn bolamyz. "Astana Tazalyqty" jekeshelendirý baǵdarlamasynan alyp tastaýdy josparlap otyrmyz. Kásiporyn tek sýaǵar máselesimen jumys isteıtin bolady", — dep qorytty ákim.
