Jańa shara polıseılerge shtattan tys jaǵdaılardyń týyndaýyna meıilinshe jedel áreket etýge múmkindik beredi, dep habarlaıdy Atyraý oblysynyń Óńirlik komýnıkasıalar qyzmeti.

Jańa obektilerdiń JSQ aǵymdaǵy jyly naýryzda memlekettik saraptamanyń oń qorytyndysyn aldy, stasıonarlyq polısıa beketteriniń qurylysy bastaldy.

- Atyraý qalasyna kire beristerde barlyǵy 4 beket salynatyn bolady, olar Astrahan, Oral, Qulsary jáne Inder jaqtarynan kiretin joldarda bolmaq. Bul polıseılerge qandaı da bir shtattan tys jaǵdaılar týyndaǵan kezde meıilinshe jedel áreket etýge, sondaı-aq qalaǵa kiretin jáne shyǵatyn barlyq avtokólikter týraly derekterdi bilýge múmkindik beredi, - dedi Atyraý oblystyq İİD baspasóz qyzmetinde.

Spıkerdiń aıtýynsha, qylmystardyń negizgi bóligi kóbine demalys kúnderi Atyraýǵa jeńil tabys tabýǵa basqa oblystardan keletin «gastrolerlermen» jasalady. Sondaı-aq avtomobıl aǵynyn múltiksiz baqylaý úshin balyq aýlaý maýsymy kezinde beketterdiń róli erekshe mańyzdy, bul brakonerlikpen kúreske aıtaprlyqtaı úles qosady, - dep atap kórsetti departamentte.

Beketter barlyq avtokólikterdi esepke alýdy avtomatty rejımde júrgizetin derekter bazasy bar beınekameralarmen jabdyqtalatyn bolady.

Atyraý oblysy Qurylys basqarmasynyń aqparaty boıynsha obektiler qurylysyn aǵymdaǵy jylǵy qyrkúıekte aıaqtaý josparlanýda. Jańa beketter
Atyraý-Oral, Atyraý-Inder, Atyraý-Aqtaý jáne Kotáevka-Rýbej avtojoldarynda ornatylatyn bolady.

Esterińizge salsaq, buǵan deıin 2016 jyly óńir basshysy Nurlan Noǵaev Inder aýdanyna jumys sapary kezinde qaladan shyǵatyn jerlerde polısıa beketteriniń qurylysyn salý tujyrymdamasyn ázirleýge tapsyrma bergen bolatyn. Oblys ákimi mundaı sharanyń kólik aǵynyn baqylaýdy kúsheıtýge múmkindik beretinin, júrgizýshilerdi tártipke salatynyn jáne jol qozǵalysynyń qaýipsizdigine qolaıly áserin tıgizetinin basa aıtty.