Alımuhammed Quttumuratuly aparattyq keńes barysynda qaramaǵyndaǵylarǵa oblys ortalyǵyn abattandyrýdyń jańa tujyrymdamasyn ázirleýdi tapsyrdy, dep habarlady Atyraý qalasy ákimdiginiń baspasóz-qyzmeti.

Búgin, 30 shildede aparattyq keńes barysynda qala basshysy Atyraý qalasyn kógaldandyrý men abattandyrýǵa qatysty birden birneshe másele kóterdi. Atap aıtqanda, Alımuhammed Quttumuratuly jasyl ekpelerdi sýarý, aǵashtardy kesý, sándik gúlder otyrǵyzý jáne shaǵyn arhıtektýralyq qurylystar ornatý máselelerin qozǵady.

- Qala turǵyndary tarapynan aǵashtar men butaly ósimdikterdi sýarýdyń nasharlyǵyna óte kóptegen renishter aıtylýda. Qazir ortalyq kóshelerdiń ózinde qýraǵan jasyl ekpelerdi baıqaýǵa bolady. Sýarýǵa arnalǵan barlyq sý qubyrlarynyń durystyǵyn, sý qysymynyń deńgeıin tekserý qajet. Eger tamshylatyp sýarý júıesi qalamyzǵa jaramaıtyn bolsa, onda ádettegi sý qubyryn júrgizińizder, bizdiń mindetimiz – barlyq jasyl ekpelerdi saqtaý, - dep tapsyrdy qala basshysy qaramaǵyndaǵylarǵa.
Sonymen qatar, Alımuhammed Quttumuratuly oblys ortalyǵynyń estetıkalyq bezendirilýiniń sánsizdigin, shaǵyn arhıtektýralyq keskinderdi jobalaý jáne qalany kógaldandyrý men sándeý kezinde ortaq júıeniń joqtyǵyn bas aıtty.

- Qala turǵyndary sońǵy kezderi qalany bezendirýge qatysty narazylyqtar bildirýde, biryńǵaı tujyrymdama joq. TKSH bólimine qalany kógaldandyrý jáne abattandyrý tujyrymdamasyn ázirleýdi tapsyramyn. Oblys ortalyǵyn bezendirýge arnalǵan arhıtektýralyq nysandar men jasyl ekpeler jalpy qalanyń stıli esebimen ornatylýy qajet jáne úılesimsiz kórinbeýi tıis, -dedi Alımuhammed Quttumuratuly TKSH, jolaýshylar kóligi jáne avtomobıl joldary bóliminiń basshysyna qaratyp.