Qurmanǵazy aýdanyna jumys sapary barysynda Atyraý oblysynyń ákimi Nurlan Noǵaev qaramaǵyndaǵylarǵa aýyldyq eldi mekenderdi damytýǵa qatysty birqatar naqty tapsyrmalar berdi, dep habarlaıdy Atyraý oblysynyń Óńirlik komýnıkasıalar qyzmeti.

Azǵyr óńirine saparynyń ekinshi kúni Nurlan Noǵaev birqatar ádeýmettik obektilerdi aralap, Asan, Qońyrterek, Qoıandy, Jalǵyzapan jáneı Batyrbek aýyldarynda jergilikti turǵyndarmen áńgimelesti. Óńir basshysy shalǵaıdaǵy eldi mekenderdi aýyz sýmen qamtamasyz etý jergilikti atqarýshy organdardyń aldynda turǵan birinshi kezektegi mindetterdiń biri ekenin basa aıtyp, jeke toqtaldy. 

- Bizdiń mindetimiz turǵyndardyń ómirin jaqsartý úshin barlyq jaǵdaılardy jasaý, qolda bar barlyq quraldardy paıdalaný, - dedi Nurlan Noǵaev. – Bul proseske barlyq memlekettik organdardyń qyzmetkerleri, qoǵamdyq ınstıtýttar, barlyq deńgeıdegi máslıhattar tartylýy tıis. Ákimdikter jergilikti jerlerde bizge jobalardy usynýy tıis –jergilikti turǵyndardyń úmit-armandaryn, qandaı da bir eldi mekendi jaqsartý úshin neniń jetispeıtinin bárinen buryn sizder jaqsy bilesizder. Ókinishke oraı, keıbir aýdandarda jumystyń bul tetigi tolyq iske aspaıdy. Ákimder, depýtattar, qoǵam qaıratkerleri – osy iske qatysýy tıis. Jaqsy jobalarǵa biz barlyq ýaqytta qarajat tabamyz – sizderdiń mindetterińiz olardy jetkizý.

Azǵyr óńiriniń turǵyndaryn 2020 jylǵa deıin óńirlerdi damytý baǵdarlamasy aıasynda sapaly aýyz sýmen qamtamasyz etý úshin sýmen jabdyqtaý obektilerin rekonstrýksıalaý, qurylysyn salý jáne jańǵyrtý boıynsha sharalar qabyldanýda ekenin atap ótken jón.

Olardyń qataryna qazirgi ýaqytta Qoıandy toptyq sý qubyry arqyly aýyz sýmen qamtamasyz etilip otyrǵan Azǵyr óńiriniń 7 eldi mekeni kiredi (Azǵyr, Balqudyq, Batyrbek, Súıindik, Jalǵyzapan, Qońyrterek, Eginqudyq)

Asan, Úshtaǵan eldi mekenderin aýyz sýmen qamtamasyz etý úshin jobalaý-smetalyq qujattama jasaqtalýda. Qoshalaq jáne Nıetbaı aýyldary jer asty sýyn paıdalanyp, aýyz sýmen qamtamasyz etilýde.