Atyraý oblysynda shalǵaıdaǵy eldi mekenderdi gazdandyrý boıynsha belsendi jumystar júrgizilýde.
Joba Memleket basshysynyń bes áleýmettik bastamasy aıasynda iske asyrylýda, dep habarlaıdy Atyraý oblysynyń Óńirlik komýnıkasıalar qyzmeti.
Qazirgi ýaqytta Atyraý jáne Qulsary qalalarynan basqa óńirde 130 eldi meken gazdandyrylǵan. Bul rette qalǵan 34 shaǵyn eldi mekenderdi gazdandyrý máselesi qarastyrylýda.
2017 jyly Qurmanǵazy aýdanynyń Azǵyr aýyldyq okrýgine qarasty 10 eldi mekendi gazben jabdyqtaý jumystary bastalǵan bolatyn. Atalǵan aýdandaǵy kentter men aýyldardy gazdandyrý jer qoınaýyn paıdalanýshylardyń áleýmettik aýdarymdary esebinen júrgiziledi. Jobanyń jalpy quny – 10 mlrd teńge. Joba aıasynda alys ornalasqan eldi mekenderge uzyndyǵy 365 shaqyrym magıstraldyq gaz qubyryn tóseý josparlanýda. Búgingi kúni 274 shaqyrym gaz qubyry jelisi júrgizildi.
Munan basqa Mahambet, Isataı jáne Qyzylqoǵa aýdandarynyń eldi mekenderin gazdandyrý jumystary júrgizilýde. Mamandardyń málimetteri boıynsha osy jumystar aıaqtalǵannan keıin óńirdiń eldi mekenderiniń 93,3%-y kógildir otynmen qamtamasyz etiletin bolady.
Oblystyq Energetıka jáne TKSH basqarmasy basshysynyń orynbasary Asan Nurǵalıevtyń aıtýynsha búgingi kúni oblysta aýyldardy gazdandyrý boıynsha úsh joba iske asyrylýda. Aǵymdaǵy jyldyń sońyna deıin Mahambet aýdanyndaǵy Atambaı, Balaoraz jáne Kózdiqara aýyldaryn gazdandyrý jumystary aıaqtalýy tıis.
2019 jyly Qyzylqoǵa aýdanynyń alty aýylyn gazdandyrý josparlanýda. Qazirgi tańda jobanyń JSQ daıyndalýda. Barlyq josparlanǵan jumystar aıaqtalǵannan keıin Atyraý oblysynda 153 aýyl tabıǵı gazben jabdyqtalatyn bolady.
