Ortalyq Azıa elderine Aýǵanstannan tóndiretin terorıstik qaýip-qaterler ulǵaıýy osy elge Sırıa jáne Iraktan sheteldik terrorısterdiń qonys aýdarýymen baılanysty. Bul týraly BUU Bas Hatshysynyń orynbasary Vladımır Voronkov BUU Qaýipsizdik Keńesiniń «Terorıstik aktilerden halyqaralyq beıbitshilikke tóndiretin qaýipter» atty otyrysynda óz sóz sóıleýinde atap ótti, dep habarlaıdy Qamshy.kz aqparat agenttigi QR SİM baspasóz qyzmetine silteme jasap.

V. Voronkov BUU Qaýipsizdik Keńesiniń múshelerine BUU Bas hatshysy Antonıý Gýterrıshtiń DAISH terorıstik uıymynan halyqaralyq beıbitshilikke jáne qaýipsizdikke qaýip-qaterleri jáne BUU-nyń múshe-memleketterge osy qaýip-qaterlerine qarsy áreketterge kórsetip jatqan qoldaýlary týraly 7-shi baıandamasyn usyndy.

Otyrys barysynda Qazaqstannyń BUU janyndaǵy Turaqty ókili Qaırat Omarov terorızmge qarsy kúres úshin halyqaralyq, óńirlik jáne ulttyq deńgeı kúsh-jigerlerdi biriktirý shaqyryp, basym maqsaty retinde jastar arasynda terorızmdi jáne ekstremızmdi taratýdy aldyn alýdy atady.

Q.Omarov sondaı-aq Qazaqstannyń birqatar naqty usynystaryn atap ótti. Olardyń ishinde Memleket basshysy bastamashylyq etken atalǵan qaýip-qatermen kúresý úshin BUU-na múshe-memleketterdiń kópjaqty saıası mindettemesi retindegi «Terorızmnen erkin beıbit álemge qol jetý úshin áreket kodeksin» qabyldaý.

Sonymen qatar, esirtkiniń zańsyz aınalymy, tabıǵı resýrstar men mádenı artefaktilerdi zańsyz satý, sondaı-aq terorızmdi qarjylandyrýdyń negizgi kózderi bolyp tabylatyn jańa tehnologıalar men tólem ádisterin qatań baqylaý men jolyn kesýge erekshe nazar aýdaryldy.

Aımaqtyq jáne halyqaralyq derek qorlar arasynda terrorısterge qatysty bıometrıalyq aqparattarmen almasýdy kúsheıtý qajettiligi aıtyldy. Bul óz jaǵynan destrýktıvti toptar men jeke tulǵalar týraly ýaqtyly aqparat alýǵa, sondaı-aq ınternet jelisindegi terorıstik ıdeıalardy taratýyn aldyn-alýdyń mańyzdylyǵy basa atap ótildi.

Qazaqstannyń turaqty ókili sondaı-aq terorıstik qaýip-qater deńgeıi joǵary elderinde turaqty ekonomıkalyq damýyn jáne terorıstik áreketine qatystyrýǵa balama retinde eń aldymen jastardy jumys oryndarmen qamtamasyz etý qajettiligine nazar aýdardy.

Ulybrıtanıa Syrtqy ister mınıstri Djeremı Hanttyń tóraǵalymen ótken Qaýipsizdik Keńestiń otyrysynda BUU Terorızmge qarsy Atqarýshy dırektorattyń dırektory Mıshel Konnıks, Radıkalızasıany zertteý jónindegi Halyqaralyq ortalyqtyń jetekshi sarapshysy Djoana Kýk, sondaı-aq Qaýipsizdik Keńestiń basqa músheleri sóz sóıledi.

Otyrys aldynda Qaýipsizdik Keńes músheleri jáne BUU Bas hatshysy Antonıý Gýterrısh 2018 jylǵy 18 tamyzda kóz jumǵan BUU-nyń burynǵy basshysy Kofı Annandy bir mınýt únsizdikpen eske aldy.