Astanada nóser jańbyr kezinde qaıyqpen júzip, el esinde qalǵan eki jigittiń biri sot qaýlysyna qalaı qaraıtynyn aıtyp, aldaǵy josparlarymen bólisti dep habarlaıdy Qamshy.kz aqparat agenttigi sputniknews.kz saıtynyń deregin negizge alyp. 

25 jastaǵy Jandos Sadybektiń aıtýynsha, nóser jańbyr jaýǵan kúni ol dosy Dmıtrııdi shaqyryp, qarmaq pen qaıyqty alyp, óziniń "balalyǵyn" vıdeoǵa túsirýge bel býǵan. 

"Biz apattyq jaǵdaı týǵyzbaımyz, eshkimge kedergi keltirmeımiz dep oıladyq. Árıne, jurttyń nazary bizge aýatynyn túsindik, biraq dál osyndaı qoǵamdyq rezonans týady dep oılamaǵan edik", —dedi Jandos Sputnik Qazaqstan tilshisine. 

Jas jigit qalalyq sot dosy ekeýine 5 AEK (árbirine 12 myń 025 teńge nemese 33 dollar) aıyppul salǵanda, qazaqstandyqtardyń olarǵa qoldaý kórsetkeni úshin óte qýanyshty ekenin jasyrmady. 

Astananyń ishki ister departamenti er adamdardyń qylyǵyn usaq buzaqylyq dep baǵalap, Ákimshilik quqyq buzýshylyqtar týraly kodekstiń 434-babyna sáıkes hattama toltyrdy. 

"Zańgerler menimen baılanysqa shyqty. Olar bizdiń áreketimizde eshqandaı  buzaqylyq bolmaǵanyn aıtyp otyr. Bizdiń qylyǵymyzdy qaıyqtardy paıdalaný erejesin buzý retinde ǵana qarastyrýǵa bolady, odan basqa eshteńe emes", — dep sózin jalǵady atyshýly vıdeonyń keıipkeri. 

Sot sheshimi boıynsha jigitter bir aı ishinde aıyppul tóleýi tıis nemese on kún ishinde sheshimge shaǵym túsire alady. 

"Apelásıa týraly áli oılanyp jatyrmyz, búkil el bizdi qoldap otyr. Men ózimdi kinálimin, zań buzdym dep sanamaımyn. Bir zańger tipti "qaıyqqa zańgerdi otyrǵyzyp alyp, qalaǵan jerlerińde júzińder" dep qaljyńdady", — deıdi Jandos Sadybek. 

Jas jigit bolashaqta qyzyqty beınerolıkter túsirip, hobbı retinde blogıngpen aınalysýdy josparlap otyr. 

Birneshe kún ishinde eki eskekshi túsken vıdeo 500 myńnan astam ret qaraldy. 

Astanada 20 tamyz kúni nóser jaýyn jaýǵan edi. Tópelegen jaýynnan qala kóshelerin lezde sý basty. Qala ákimdigi nóser júıesi máselesin kelesi jyly sheshýge ýáde berdi.