Almatyda jyl sońyna deıin 1 myń 500 otbasy baspanaly bolady. Bul turǵyda «Nurly jer» jáne «Almaty jastary» sekildi baǵdarlamalar júzege asyrylýda. Al almatylyqtar «7-20-25» baǵdarlamasyna belsene qatysyp jatyr.

Búginde qalada turǵyn úı kezeginde turǵan azamattar sany 22 myńnan asady. Olar kezek qarqynyn e-gov.kz portaly arqyly baqylap otyr. Tipti, qaıta tirkelý de elektrondy túrde jasalady. Iaǵnı, jeńildikke ıe azamattarǵa ol úshin Turǵyn úı jáne turǵyn úı ınspeksıasy basqarmasyna barýdyń qajeti joq.

«Qujatty Halyqqa qyzmet kórsetý ortalyqtaryna baryp nemese e-gov.kz portaly arqyly tapsyrýǵa bolady. Eger qaıta tirkelmeseńiz biz ony ózimiz iske asyramyz. 2017 jyldan beri ótkizip júrmiz. Byltyr 2700 azamatty kezekten shyǵardyq. Iaǵnı, bul kezekke turyp qaıta tirkelmegen azmattar», – dedi Almaty qalasy Turǵyn úı jáne turǵyn úı ınspeksıasy basqarmasynyń basshysy Ánýar Óskenbaev.

Saıaly yqshamaýdanynda «Nurly jer» baǵdarlamasy boıynsha salynǵan jańa páterler beriledi. Munda memlekettik, búdjettik mekeme qyzmetkerleri, kópbalaly jáne tolyq emes otbasylar qonystanbaq. Al «Almaty jastary» baǵdarlamasy boıynsha qala ákimdigi bıyl 2 mıllıard teńge bólgen bolatyn.  

«Bul ásirese, jas otbasylar úshin óte qolaıly baǵdarlama. Máselen, Áýezov aýdanynda 120 myń teńgege páter jaldap turǵan otbasy boldy. Al bizdegi birinshi pýl boıynsha 10 mıllıon teńgege baspana aldy. Olar bastapqy 6 jylda aldyn ala qaryz boıynsha 94 myń teńge tóleıdi. Keıinnen turǵyn úı qaryzyna kóshken soń 11 jyl boıy 46 myń teńgeden tóleıdi», – dedi «Qazaqstannyń TQJB» AQ Basqarma tóraıymy Lázzat Ibragımova.

«7-20-25» baǵdarlamasy boıynsha jýyrda 1 myń otbasy qonys toıyn toılaıdy. Osy ýaqytqa deıin 10 mıllıard teńge maquldanǵan. Sonyń 4 mıllıard qarjysy almatylyqtardyń baspana máselesin sheshýge jumsalmaq. Al jyl aıaǵyna deıin ótinim qarjysy taǵy eki ese artpaq.

«Almaty qalasynda 12 mıllıon teńgege bir páter alatyn bolsa, bizdiń nesıe alýshymyz onyń eki mıllıonyn alǵashqy jarna retinde tóleıdi. 10 mıllıon teńgeni biz 25 jylǵa beremiz. Sonda onyń aı saıynǵy tólemi 71 myń teńge bolady», – dedi «Baspana» ıpotekalyq uıymy» AQ Basqarma tóraǵasy Qaırat Altynbekov.

Tamyz aıynyń aıaǵynda qalalyq Turǵyn úı jáne turǵyn úı ınspeksıasy basqarmasynda operasıalyq zal ashylmaq. Onda azamattar keńesshilerdiń kómegin ala alady.