Kópqabatty úılerge ortaq jylý eseptegish quralyn qoıǵan almatylyqtar  komýnaldyq tólemdi 55 paıyzǵa az tólep otyr. Bir ǵana turǵyn úı kesheniniń turǵyndary ótken qysta jylýǵa tóleıtin tólemnen 4 mln teńgege jýyq qarajat únemdegen.

Qazir qala boıynsha jylý eseptegish quraldaryn ornatý baǵdarlamasy qarqyndy júzege asýda. Búgingi kúni megapolıstegi úılerdiń 64 paıyzynda únemdi qondyrǵy bar.

Áýezov aýdany – Almatyda ortaq jylý eseptegish quraldaryn ornatýdan kósh bastap tur. Bul aýdandaǵy kópqabatty 1704 úıdiń 95 paıyzy eseptegish quralmen jabdyqtalǵan. Sonyń arqasynda, 243 páterli myna turǵyn úı kesheni ótken jylý maýsymynda 3 mln 837 myń teńge únemdegen. 

«Salystyrmaly túrde aıtar bolsaq, eger úıde jalpy qoıylǵan qondyrǵy bolmasa, qala boıynsha 1 tekshe metr ystyq sýdyń baǵasy 588 teńgeni, al jylýdyń 1 sharshy metrine 268 teńgeni quraıdy. Al qondyrǵy qoıǵan kezde, qansha naqty jylý berildi, sony ǵana eseptep shyǵaryp beredi», – dedi «Mamyr-7» PIK tóraǵasy Muratjan Jaqypbaı.

Ortaq jylý eseptegish quralynyń janynda mynadaı modem bolady. Ol barlyq kórsetkishti Almaty jylý júıesine avtomatty túrde joldaıdy. Esep quralyn birneshe jyldan beri paıdalanatyn turǵyndardyń aıtýynsha, únemniń úlesi ájepteýir. Ásirese, qys mezgilinde komýnaldyq tólemderdi ózgelerden eki ese az tóleımiz deıdi.

«Bizdiń osy úıge kóship kelgenimizge eki-úsh jyl boldy. Osy qurylǵylardy qoıǵaly beri komýnaldyq tólemderimiz óte az keledi. Óti tıimdi eken, úıimiz de qysta jyly bolyp turady», – deıdi turǵyn Saltanat Ataqulova.

«Baǵdarlama boıynsha qalanyń 64 paıyzy ortaq eseptegish quraldarymen qamtamasyz etildi. Eger de jylý energıasynyń 1 Gıga kalorıasy ortaq eseptegish quralynsyz 8139 teńge bolsa, osy qural ornatylǵan úılerde 5967 teńgeni quraıdy», – dedi «Almaty jylý júıesi» JSHS ınjeneri Talǵat Baıahmetov.

Ortaq jylý eseptegish quraldyń taǵy bir tıimdi tusy – qarapaıym eseptegish quraly barlar jaz mezgilinde ystyq sýdyń tekshe metrine 588 teńge tólese, ortaq eseptegish qural ornatqandar naqty qoldanylǵan sýǵa ǵana tóleıdi eken. Jáne buǵan deıin turǵyndarǵa esep quraldyń qunyn bólip tóleýge 1 jyl ýaqyt berilip kelse, qazir 4 jyl kóleminde bólip tóleýge múmkindik berilgen, ıaǵnı, bir páterden aıyna nebári 200-500 teńgedeı shaǵady. Almaty jylý júıesiniń mamandary jyl sońyna deıin 7597 qurylǵy ornatpaq. Demek, ortaq jylý eseptegish quralymen qalanyń 90 paıyzy qamtylady degen sóz. Tek eski jáne tehnıkalyq múmkindigi joq úıler ǵana jabdyqtalmaıdy.