Almatylyq jas otbasylar jastarǵa arnalǵan turǵyn úı baǵdarlamasynyń sharapatyn kórýde. Baǵdarlamanyń ózi de «Almaty jastary» dep atalady.
Almatyda páter jaldap turatyn kóptiń biri – asyraýshysynan aıyrylǵan Láıla Qaıratqyzy. 3 balasymen pátersiz júrgen kelinshek jaldamaly úıge aı saıyn 120 myń teńgeden tóleıdi. Jalǵyzbasty ana eki jyl baspana kezeginde turǵan. Alaıda, «Almaty jastary» jobasy arqyly turǵyn úıge tezirek qol jetkizetinin túsinip, shuǵyl túrde qujat tapsyrýǵa kirisip ketken. Alǵashqy kezeńnen joǵary upaı jınap, endi tólem qabiletin rastaýda. Qazirshe bankten 1 bólmeli páterge qaryz alýǵa ótinish bildiripti.
«1 bólmeli páter. Birinshi 6 jyl-94 myń teńgeden, qalǵan 11 jylyn 46 myń teńgeden tóleımin. Ol óte qolaıly baǵdarlama dep oılaımyn. Óıtkeni, alǵashqy jarna kerek emes. Tek kredıttik tarıhyń men tólem qabiletiń jaqsy bolsa, bank ótkizedi dep úmittenip otyrmyz», – deıdi Láıla Rahymbekova.
Bıyl qalalyq ákimdikten bul baǵdarlamany qoldaý maqsatynda 2 mıllıard teńge bólingen. Bul qarajat jobanyń negizgi operatory «Turǵynúıqurylysjınaqbankine» aýdarylady. Sáıkesinshe, qarjy ınstıtýty 5 paıyzben 25 jylǵa deıin nesıe beredi. Mundaı múmkindikti qalt jibergisi kelmegen 1 myń 200-den astam almatylyq ótinish túsirgen. Alaıda olardyń 200-i ǵana ekinshi kezeńge ótken.
Eskere ketirligi, bıylǵy talaptarǵa birqatar ózgeris endi: turǵyn úıge ótinish bergen azamattyń jasy 35-ten aspaýy kerek. Biraq joldasynyń jas ereksheligi eskerilmeıdi. Sondaı-aq, ekinshi jáne odan keıingi balalarǵa byltyrǵydaı 15 baldan emes, 20 upaıdan esepteledi.
«2017 jylǵy baǵdarlamada negizgi talaptardyń biri – ótinish ıesinde jáne onymen birge turatyn otbasy quramynda jyljymaıtyn múlik joq bolýy tıis. Al aǵymdaǵy jyly ótinish ıesinde ne bolmasa otbasy quramynda jyljymaıtyn múlik kámeletke tolǵanǵa deıin, jekeshelendirýdiń nemese muragerlikke alynýdyń negizinde paıda bolǵannan keıin, ıaǵnı ortaq úlestik bolsa, onda baǵdarlamaǵa qatysýǵa ruqsat berilgen bolatyn», – dedi Almaty qalasy Turǵyn úı jáne turǵyn úı ınspeksıasy basqarmasynyń bas mamany Altynaı Álimhanova.
Azamattarǵa bank bas-aıaǵy 10 mıllıon teńge qaryz bere alady. Quny odan qymbattaý úı alǵysy keletinder alǵashqy jarnasyn tóleýlerine bolady. Mamandardyń aıtýynsha, ótinishteri ótken otbasylardyń basym bóligi nekede keminde 5 jyldan beri tur. Bank qyzmetkerleri qaryz alýshynyń tólem qabileti onyń ótinishi men otbasy músheleriniń aı saıynǵy kúnkórisinen artylǵan qarajatpen esepteletinin eskertedi.
«Adam basyna, statısıka boıynsha, Almaty, Astana, Aqtaý, Atyraý qalasynda 15 AEK eseptelinedi. 1 AEK – 2405 teńge bolǵandyqtan, adam basyna 36075 teńge ketedi. Oǵan qosa, joldasynyń jumys jaǵdaıy men bala-shaǵasynyń sanyn esepteımiz. Orta eseppen, 1 sharshy metrin 250-260 myń teńgemen eseptep alyp jatyr. Qazirgi qatysýshynyń kóbi Naýryzbaı aýdanyna baryp júr», – dedi «Turǵynúıqurylysjınaqbanki» AQ Almatydaǵy №1 qyzmet kórsetý ortalyǵynyń basshysy Kámshat Ońalbaeva.
Tólem qabileti rastalǵan soń úmitker 10 kúnniń ishinde qalaǵan páterdi ózi tańdaıdy. Alaıda, baspanany jańadan boı kótergen úıden tańdaýy tıis.
