AQSH prezıdenti Donald Tramptyń basy taǵy daýǵa qaldy. Áleýmettik jeli qoldanýshylary "prezıdent memlekettik týdyń qalaı beınelenetinin bilmeıdi" dep kúdiktenip otyr.

Tramp Ogaıodaǵy balalar aýrýhanasynyń birine baryp, aýryp jatqan balalardyń kóńilin surap qaıtypty. Sapardan sýretterdi AQSH densaýlyq saqtaý mınıstri Aleks Azar Twitter-degi paraqshasyna jarıalady. Munda jeli qoldanýshylarynyń nazaryn aýdarǵan Tramptyń saýapty isi emes, balalarmen birge salǵan memlekettik týdyń sýreti. Mınıstr jarıalaǵan fotolardyń birinde prezıdent týdyń qyzyl túske boıalý kerek tusyn kókpen boıaǵany baıqalady.

«Tramp amerıkalyq týdyń qalaı beınelenetinin de bilmeıdi. Mekteptegi tapsyrmany oryndap jatqan sekildi», - dep jazdy mirandayaver esimdi Twitter qoldanýshysy.

«Bul birinshi kúni ǵoı. Balabaqshany bitirip alsyn, birnárse úırener», - dep jazdy @Subachef esimdi qoldanýshy.

Endi biri Aq úı basshysy AQSH emes, Reseıdiń týyn salǵysy kelgen bolar dep jatsa, ózgesi Nıderlandtyń týyn saldy dep sóz etti.

Jeli qoldanýshylarynyń arasynda Trampty jaqtaǵandar da boldy. Týdy salǵan balalardyń biri bolar, al Tramp sony jaı ǵana boıaǵysy kelgen dep mazaq etkenderdi sabyrǵa shaqyrdy.