Birinshi qyrkúıekten bastap Almatyda bes jańa sýburqaq paıda bolady. Olardyń keıbiri qaıta qalpyna keltiriletin eski fontandar.

Sonymen qatar, jańa kóshe jıhazdary men eden shamdary ornatylmaq. Bıyl Dostyq, Abaı, Abylaı han dańǵylyndarynǵy jaıaý júrginshiler jolaǵy jańa keıipke enbek. Jóndeý jumystary jaz boıy qarqyndy júrgizildi. Qazir merdiger mekemeniń qurylysshylary tastardy tósep jatyr.

«Respýblıka saraıynyń alańynda úlken fontan bolady, ıaǵnı eki sýburqaq qaıta jańǵyrtylyp, ortasyna bir úlken fontan ornatylady. Nege deseńiz, ol jerdegi alańnyń aýmaǵy óte keń», – dep túsindirip ótti  Almaty qalasy Sáýlet jáne qala qurylysy basqarmasy basshysynyń orynbasary Almasqan Ahmedjanov.

Abylaı han men Shevchenko kósheleriniń qıylysyna da jańa sýburqaq ornatylady. Bul aýmaqta kógaldandyrý jumystary júrgizilip, jaryqtandyrylady.

Sonymen qatar, «Almaty-2» temirjol vokzaly, Abylaı han dańǵylynyń Mámetova jáne Qabanbaı batyr kóshelerimen qıylystarynda da dál sondaı jumystar júrgizilmek.

Al elimizde shyǵarylatyn kóshe jıhazdary tamyz aıynyń ortasynda Almaty kóshelerine ornatyla bastaıdy.