Mektep formasyn satyp alý bıyl qoljetimdi baǵada bolmaq. Mektep oqýshylaryna arnaıy kıim tigetin otandyq kásipkerlerge satý oryndaryn ákimdik tegin berip jatyr. Esesine, jeńil ónerkásip salasynyń jetekshi ókilderi taýarlaryn naryqtyq baǵadan 20 paıyzǵa tómen satýlary tıis.
Qudaı bergen qos qulynyn qatarynan qaldyrǵysy kelmeı, jyl saıyn jańa mektep formasyn alatyn ananyń biri – Venera. Uly men qyzyna kıim tańdap júrgen kelinshek mektep formasynyń quny sapasyna sáıkes bolsa deıdi. Jyl saıyn jármeńkege keletin ananyń aıtýynsha, satylyp jatqan kıimderdiń baǵasy bazardan tómen bolmasada, qymbat emes.
«Jylyna bir formadan alamyz. Eki sym, bir pıdjak. Jyl uqypty boıyna kıedi. Sondyqtan bizge jetkilikti», – deıdi Venera Musataeva.
Jármeńkede jeıde, kostúmderden bólek, qazaq kásipkerleriniń qolynan shyqqan bylǵary týflılerdi de tabýǵa bolady. Shıkizaty men tigin mashınalary sheteldik bolsa da, sáni men sapasyn arttyrýdyń ádisterin ózderi oılap tapqan.
«38 razmerge deıingi beldemsheler 5500 teńgeden bastap, 6000 teńgege deıin turady. Sarafandar 7 myń teńgeden bastalady. Kostúmder 13 myń teńgeden bar. Uldarǵa kostúmder 13 500 teńgeden bastalady», – dedi kásipker Asylgúl Qýanbaeva.
Ákimdik jármeńgege qatysqan kásipkerlerge satý alańdaryn tegin usynyp otyr. Kópshilikke kórneý orynda bir aıdan asa tegin turyp, taýaryn saýdalaıtyn kásipkerlerge qoıylatyn talap – qun kóshedegi dúkenderden tómen bolýy tıis. Bastapqy fabrıka baǵasynan asa asyrmaımyz degen 9 kompanıa kıimderin qoıǵan.
«Ónim óndiris qunynan aspaýy tıis. Aldymen bul jerde mektep oqýshysyna qajetti formanyń barlyq túrin tabýǵa bolady. Jármeńkeniń basty maqsaty – otandyq óndiristi qoldaý ári turǵyndarǵa yńǵaıly jaǵdaı jasaý, sapaly taýar túrlerin usyný», – dedi Almaty qalasy Kásipkerlikti jáne ındýstrıaldyq-ınnovasıalyq damý basqarmasy basshysynyń orynbasary Rústem Voroshılov.
Qolaıly jaǵdaı jasalǵanyna qýanǵan kásipkerler ótken jylǵy jármeńkede 4 myńnan astam adam kelip, qajetin alyp ketken deıdi. Oqýshyǵa arnalǵan brend kıimderdiń kórme-jármeńkesi qyrkúıektiń 10-na deıin jalǵasady.
