Almaty metrosynyń «Saryarqa», «Dostyq» jáne «Qalqaman» beketteriniń qurylysyna 100 mıllıard teńge qarajat jumsalady. Alǵashqy ekeýi 2021-shi jyly paıdalanýǵa beriledi.

Qazir «Qalqaman» beketiniń jobalyq smetalyq qujattary ázirlenip jatyr, onyń qurylysy 47 mıllıard teńgege baǵalanýda. Al keleshekte salynatyn avtobeket stansasy qalanyń transport habyna aınalady. Bul Almatyǵa keletin kólik nópirine jáne kepteliske oń áserin tıgizedi.

Almaty metrosynyń «Qalqaman» beketi qurylysy úshin 152 jer telimindegi ǵımarattar súriledi. Bul maqsatta memleket qazynasynan 47 mıllıard teńge bólingen. «Metropolıten» komýnaldyq memlekettik kásiporny ókilderiniń aıtýynsha, «Jaılaý» yqshamaýdanynyń turǵyndary qarsylyq tanytyp, mekeme atyna hat jazǵan. Bul máselemen qazir Jer qatynastary basqarmasy aınalysyp jatqan kórinedi.

«Jaılaý» yqshamaýdanyndaǵy 15 jer telimi súrýge jatady. Jerasty joly Abaı dańǵylymen ótetindikten, tehnıkalyq talaptarǵa sáıkes týnel jıegi keminde 40 metrdi quraýy kerek. Turǵyndar shaǵymdaryn hat arqyly kórsetti. Qazirgi ýaqytta bul másele qaralyp jatyr. Qalalyq Jer qatynastary basqarmasy atalǵan ýchaskelerdi satyp alady», – dedi «Metropolıten» KMK Kúrdeli qurylys qyzmetiniń bólim basshysy Maqsat Seıtqulov.

Qazir «Qalqaman» beketi boıynsha jobalyq smetalyq qujattar ázirlenip, tıisti saraptama jasalǵan. Al salynyp jatqan «Saryarqa» jáne «Dostyq» stansalary 2021-shi jyly óz jumysyn bastaıdy. «Almatymetroqurylys» mekemesiniń málimetinshe qos bekettiń qurylysyna 67 mıllıardtan astam qarajat bólingen. Bıylǵa 9 mıllıard teńge bólinse, onyń 5 mıllıardy ıgerilipti.

«Bul somaǵa tehnıkalyq qadaǵalaý, jobalaý, qurylys jumystary sıaqty barlyq shyǵyndar kiredi. Atalǵan stansalardyń qurylysy bastalǵaly, ıaǵnı 2015-shi jyldan bastap, 25 mıllıard teńge ıgerildi», – dedi «Almatymetroqurylys» AQ Óndiristik tehnıkalyq departamentiniń dırektory Jamılá Arysova.

Mekeme ókilderi qos stansanyń halyq ıgiligine berilýi tikeleı qarjyǵa baılanysty ekenin alǵa tartty. «Saryarqa» men «Dostyq» beketiniń jalpy uzyndyǵy 3 shaqyrymnan asyp jyǵylady. «Saryarqa» beketi birinshi, úshinshi, besinshi, jetinshi shaǵyn aýdandardyń aýmaǵyn qamtysa, «Dostyq» beketi Jetisý jáne Mamyr yqshamaýdandarynyń turǵyndaryna yńǵaıly bolmaq. Jańa beketter paıdalanýǵa berilse, táýligine 85 myń jolaýshy dittegen jerine yńǵaıly ári jyldam jete alady. Sáıkesinshe, «Abaı» beketiniń júktemesi azaıady.