Almatyda trıatlonnan Azıa kýbogynyń jeńimpazdary anyqtaldy. Alǵash ret ońtústik astanada ótken jarysqa 16 elden kelgen 60-qa jýyq atlet qatysty.
Aıta keterligi, saıysta Azıa elderinen bólek Avstralıa, Belgıa, Japonıanyń da sport sańlaqtary baq synasty. Senbi kúni bastalǵan baıraqty básekeni tamashalaýǵa qala ákimi Baýyrjan Baıbek kelip, sportshylarǵa sáttilik tiledi.
«Biz qazirgi kezde qala turǵyndarynyń belsendi jáne salaýatty demalýy ,ıaǵnı, velosıped tebýi, júgirýi,jaıaý júrýi úshin úlken múmkindikter jasaýdamyz. Qalada 68 kılometr velojoldar abattandyryldy, taıaý jyldary biz olardy 100 kılometrge deıin jetkizýdi kózdep otyrmyz. Qazirgi kezde stýdentter arasynda fýtzaldan ótetin álem chempıonatyna daıyndalýdamyz. Almatyda alǵash ret uıymdastyrylǵan trıatlonnan Azıa kýbogy da osy sport túriniń elimizde, bizdiń qalamyzda damýyna serpin beredi degen senimdemin», – dedi Almaty qalasynyń ákimi Baýyrjan Baıbek.
Qala basshysynyń quttyqtaý sózinen soń, «Elite» sanatyndaǵy erler men áıelder synǵa tústi. Sportshylar Saıran kólinde 750 metr qashyqtyqta júzip shyǵyp, sodan keıin 10 km velosıpedpen jarysty. Saıys munymen toqtaǵan joq, ármen qaraı qatysýshylar 5 shaqyrymdy júgirip ótýi tıis. Úsh kezeńnen súrinbeı ótken Japonıa men Koreıa atletteri úzdik úshtikke endi. Birinshi oryndy japon qyzy Nıına Kıshımoto ıelendi. Qazaqstandyq sportshy qyzdar alǵashqy ondyqqa kirgenimen, júldeli oryndardan kórine almady.
«Bul meniń sporttyq mansabymdaǵy eń úzdik jarystardyń biri boldy. Saıys ońaıǵa soqqan joq, qarsylastarym da myqty eken. Degenmen, birinshi bolyp kelgenime qýanyshtymyn», – dedi trıatlonnan Azıa kýbogynyń jeńimpazy Nıına Kıshımoto.
«Start óte qıyn boldy. Sebebi, Qostanaıda bizdiń daıyndalatyn joldar tegis. Al munda joǵary qaraı júgirgende azdap qıynǵa soqty. Júzý men velojoldan jaqsy óttim. Jalpy, fınıshke 16-shy bolyp keldim. Kelesi joly tyńǵylyqty daıyndalatyn bolamyz», – dedi qazaqstandyq sportshy (Qostanaı) Iana Morozova.
Erler arasynda Gonkongtan kelgen Oskar Koggınsqa birinshi oryn buıyrdy. Qazaqstandyq sportshylar 9-shy, 10-shy, 14-shi oryndarǵa taban tiredi.
«Start ońaıǵa soqqan joq. Velosıped, trassa, bári jaqsy boldy. Velokezeńde artta qalyp qoıdym. Osy saıystan jaqsy nátıje kórsetemin dep oılaǵan edim, degenmen, bul jarys», – dedi qazaqstandyq sportshy Semen Pıvovarov.
«Bizdiń úmitimiz aqtaldy desem bolady. Bári de oıdaǵydaı ótti. Myqty básekelestikke qaramastan, atletterimiz úzdik ondyqqa kirdi. Qazaqstandyq sportshylar: Meıirlan Ysqaqov 9-oshy ryn, al Temirlan Temirov 10-shy orynǵa jaıǵasty. Bizdiń sportshylarymyzdyń jas ekenin, elimizde trıatlonnyń endi damyp kele jatqanyn eskersek, bul jaqsy kórsetkish. Áıelder arasynda atletimiz 4-shi oryn aldy. Endi elimizdiń barlyq aımaǵynda trıatlondy damytsaq degen maqsatymyz bar», – dedi «Triathlon Asian Sup Almaty» uıymdastyrý komıtetiniń dırektory Aqmaral Espenbetova.
Halyqaralyq sport saıysy eki kúnge sozyldy. Birinshi kúni kásibıler jarysqa tússe, al ekinshi kúni ár túrli jastaǵy tirkelgen 170-ke jýyq áýesqoı sportshynyń básekesi ótti. Áýesqoılar arasynda almatylyq Aslan Ábdrahmanov jeńis tuǵyrynan kórindi. Aıta keteıin, baıraqty básekege uıymdastyrýshylar tyńǵylyqty daıyndaldy. Saıran kóliniń sýy tazartylyp, aımaǵy abattandyryldy. Jıegine qum tógilip, joldary da jóndeýden ótti.
