Aıta keteıik, aıryqsha kásiporyn tek Almatyda jáne Tokıoda jumys isteıdi. Al ónimi búkil álemde suranysqa ıe. 

Almaty Indýstrıaldy aımaǵynda iske qosylǵan kásiporyn iri kópirler qurylysynda jáne sel tasqynyna qarsy qoldanylatyn berik bolat arqandardy óndiredi. Munda tehnıkalyq ólshemi jaǵynan zamanaýı jabdyqtar ornatylǵan.

«Tokyo Rope Almaty» zaýytynyń ónimderi TMD elderi men Parsy shyǵanaǵynda, sonyń ishinde Saýd Arabıasynyń iri jobalarynda qoldanylady. Al alyp shaharda shyǵarylǵan ónim Esentaı ózeni jaǵalaýynyń, Úlken Almaty ózenine deıingi avtojoldardyń, Medeý - Shymbulaq aspaly joly men «Myńjylqy» bógetiniń beriktigin arttyrý úshin paıdalanylýda.

«Elimizdegi zaýyt 2016 jyly iske qosyldy. Alǵashynda Almatyda ǵımaratty jalǵa alyp otyrdy. Keıinnen Indýstrıaldy aımaqta jer telimin alyp, zaýyt saldy», – dedi «Almaty Indýstrıaldyq aımaǵy» JSHS bóliminiń mamany Dana QALYQOVA.

Indýstrıaldy aımaqta barlyq qajetti ınfraqurylymdyq jumystar júrgizilgen. Jańa zaýyt 4 gektar aýmaqta ornalasqan. Óndiris ornynyń kólemi 3500 sharshy metrdi quraıdy. Zaýyttyń qýaty joǵary – jylyna 17 myń tonnadan astam bolat ónimderin shyǵarady. Munda qazirgi tańda 14 adam jumys isteıdi. Zamanaýı tehnologıa kóp adam kúshin qajet etpeıdi.

«Mynadaı oralǵan sym ákelinedi. Ol tolyq tekserilip, myna quralǵa qoıylady. Keıinnen pernetaqta arqyly qosamyz. Nátıjesinde, mynadaı órilgen tor shyǵady. Bir gabıondyq tor jasaý úshin bar bolǵany, 1 mınýt ýaqyt jumsalady», – dedi seh operatory Erjan KİSHİBAEV.

Kompanıanyń Japonıadan basqa elderde balamasy joq. Álemge áıgili iri 20 kópirdiń 12-sine osy kompanıanyń bolat symdary qoldanylǵan. Zaýyt ishki suranysty qanaǵattandyryp qana qoımaı, ónimdi eksporttamaq. Japondyq sapamen shyǵarylatyn qazaqstandyq ónim Ortalyq Azıa elderinen bastap, jer sharynyń túkpirine tasymaldanbaq.