Almatynyń kilem gúlzarlary tek turǵyndardyń ǵana emes, sheteldik dızaınerlerdiń qyzyǵýshylyǵyn týǵyzýda. Álemniń 8 elinen kelgen landshaft arhıtektorlary qalanyń tájirıbesin zertteýde. Olar eki kún aralyǵynda saıabaqtar men kóshe boıyna otyrǵyzylǵan gúldermen tanyspaq.

Bıyl shahardyń 53 myń sharshy metrden astam jerine ásem ósimdikter egilip, gúlzarlar jasaldy. Qalany abattandyrý úshin 8 merdiger kompanıa jumyldyrylǵan. Olar gúl otyrǵyzý jumystaryn maýsym aıynda aıaqtady.  

«Almatyǵa alǵash ret osydan eki jyl buryn kelgenmin. Saıabaqtaǵy kilem gúlzarlary erekshe unady. Menińshe, Qazaqstan postkeńestik keńistiktegi osyndaı ásem gúlzardy saqtaǵan memleket. Mundaı gúlzar kilemin Dýbaıda ǵana kórgenmin. Joǵary sapada jáne asa joǵary talǵammen egilgen osyndaı gúlzar álem boıynsha da joq dep sanaımyn», – dedi dızaıner (Sankt-Peterbýrg) Dmıtrıı Baranov.

«Almaty qalasynda buryn ózimizdiń Almatynyń aporty men Shymbulaq bolsa, odan keıin osy kilem gúlzarlar sheteldik qonaqtardy tánti etip kelgen. Sondyqtan, endi Almatynyń ózinde qazir Tuńǵysh Prezıdent saıabaǵy úlken dárejede kórsetiletin saıabaq», – dedi «Grın land» JSHS dırektory Gúlzada Qaldybaeva.