Almatydaǵy polısıa ǵımarattarynyń bıik qorshaýy qıratylmaq. Halyqty qorǵaýy tıis saqshylardyń ózderi buǵan deıin qarýly kúzet, bıik qorshaýmen oqshaýlanyp kelse, endi bul Qoǵamdyq keńestiń sheshimimen alynyp tastalmaq. Onyń ornyna polıseıler halyqqa jaqyn bolýy úshin front-keńseler ashpaq.

Áınekten jasalǵan qabyldaý kabınetterine kelgen turǵyndarǵa qylmystyq jáne ákimshilik polısıa qyzmetkerleri keńes beredi. Osylaısha azamattar tártip saqshylardan kókeıdegi saýalǵa tez jaýap alýǵa múmkindik alady. Sondaı-aq, front-keńselerde kútý zaly da qarastyrylmaq. Ázirge bul bastamanyń naqty qashan júzege asatyny belgisiz deıdi Almaty qalalyq İshki ister departamentiniń resmı ókili. Óıtkeni, osyǵan deıin qarý-jaraqtar saqtalyp kelgen mekeme strategıalyq mańyzy bar nysandar qataryna jatqan.

«İshki ister basqarmalary jaqsy qorshalýy tıis degen nusqaýlyq bar. Sondyqtan, birer jyl buryn osy jumys qolǵa alynyp, qazirgi tańda qalalyq qoǵamdyq keńestiń usynysymen bul jumys qaıta qaralyp, jýyrda bul qorshaýlar alynyp tastalýy múmkin. Ol 1-2 kúnniń sharýasy emes qaıtkende de. Tıisti qarajattar bólinýi tıis. Jáne basqa da qujattamalyq prosedýralar júrgizilýi tıis», – dedi Almaty qalasy İİD resmı ókili saltanat Ázirbek.