Eńbek daýlaryn endi sotqa jetkizbeı sheshýge bolady. Almatyda Tatýlasý ortalyǵy ashyldy. Onda medıator, sýdıa jáne psıhologtar aqysyz kómek kórsetedi. Jumysshy men jumys berýshi arasyndaǵy týyndaǵan kıkiljiń bitimgershilik jolymen retteledi.

Saltanatty túrde lentasy qıylǵan Tatýlasý ortalyǵynda jumys berýshi men jumysshy arasyndaǵy týyndaǵan daýly máseleler sotqa jetkizbeı sheshimin tabý úshin quryldy. Munda medıator, notarıýs qyzmetkerleri, jeke sot oryndaýshylary jáne psıhologtar kómek kórsetedi. Marıa Popılova qyzmet etip júrgen mekeme basshylyǵymen arada kıkiljiń jaǵdaı týyndap, daýly máseleniń sheshimi tabylmaı júrgen. Áleýmettik jelige jaǵdaıyn jazǵan kelinshekke «Almaty qalalyq Kásipodaqtar ortalyǵy» AKB mamandary kómek kórsetken.

«Almaty qalalyq Kásipodaqtar ortalyǵynyń» basshylyǵy tez arada kómek kórsetti. 2 kún ishinde másele oń sheshimin tapty. Olarǵa alǵysym sheksiz. Búgingi ashylǵan ortalyq ta talaı daýly máseleni sotqa jetkizbeı sheshýge septesedi dep oılaımyn», – dedi Marıa Popılova.

Kóbine azamattar jalaqyny ýaqytyly tólemeý boıynsha shaǵym túsiredi deıdi medıatorlar. Qalǵany jumystan zańsyz shyǵarý men basqa da máselelerge qatysty kórinedi. Sondaı-aq, aryz túsirýshilerdiń basym bóligi jumys berýshilerimen kelisim-shart bekitpeı ornalasyp jatady. Sol sebepti, sotta jumyskerlerdiń quqyǵyn qorǵaý qıynǵa soǵady.

«Jumysshy shaǵym túsirse, ony qabyldap, biz jumys berýshisine baryp mán-jaıdy anyqtaımyz. Keıde eki tarapty shaqyryp, jınalys ótkizemiz. Al keı jaǵdaıda eki tarapty bólek qaraıtyn kezder bolady. Osyndaı otyrys nátıjesinde kelisimge kelgende, biz olardyń qarym-qatynasyn jaqsartýǵa da mán beremiz», – dedi kásibı medıator Irına Rodıonova.

«Almaty qalalyq Kásipodaqtar ortalyǵynda» ashylǵan Tatýlasý ortalyǵy tańǵy saǵat 9-dan bastap, keshki altyǵa deıin jumys isteıdi. Azamattar ondaǵy mamandardan keńesterdi tegin ala alady.

«Sońǵy jyldary Almatyda eńbek daýy 1,5 ese ulǵaıyp ketti. Sondyqtan mundaı oryndar sol daýlardy azaıtýǵa septigin tıgizedi dep sanaımyn. Bitimgershilik oryndary Qonaev atyndaǵy Eýrazıalyq zań akademıasy, ál-Farabı atyndaǵy Qazaq ulttyq ýnıversıteti men «Open Almaty» qoǵamdyq qabyldaý ortalyǵynda jumys isteıdi», – dedi «Almaty qalasy Káspodaqtar ortalyǵy» aýmaqtyq kásipodaqtar birlestiginiń tóraıymy Záýresh Ómirbaeva. 

«Osyndaı ortalyqtardyń qandaı tıimdiligi bar degen suraq týyndaýy múmkin. Daý-damaıǵa qatysy bar adamdar ýaqyttaryn únemdeıdi. Ózderińiz bilesizder, Salyq kodeksi boıynsha aryz berýshiler mindetti túrde salyq tóleýi kerek. Sol salyqty tólemeı-aq, osy jerdegi tegin medıatorlardyń jáne zańgerlerdiń kómegine júginýine bolady», – deıdi Almaty qalalyq sotynyń tóraǵasy Nurǵazy Ábdiqanov.

Qazirgi kezde kásipodaqtardyń negizgi mindeti – eńbek daýlaryn sheshýmen qatar, jumysshylardyń bos ýaqytyn uıymdastyrý. Onshaqty jyl buryn mundaı qaýymdastyqtar turǵyn úı alý nemese qyzmetkerdiń balasyn balabaqshaǵa tirkeýge járdemdesý sıaqty máselelerdi sheshýmen ǵana aınalysatyn.

Búginde Almatyda quramyna 187 myń adam kiretin 657 kásipodaq uıymy bar.