Almatyda ınklúzıvti bilim beretin mektep jańa oqý jylynan bastap oqýshylardy qabyldaıdy. Bul týraly Almaty qalasynyń ákimi Baýyrjan Baıbek Tamyz keńesinde málimdedi.

Inklúzıvti bilim ordasy zamanaýı qurylǵylarmen jabdyqtalǵan.  Al muǵalimder endi tek 5 qujatty toltyratyn bolady. Burynǵydaı aýlalardy aralap, ózderine tıesili emes jumystardy atqarmaıdy. Almaty qalasy bilim berý qyzmetkerleriniń tamyz keńesinde taǵy ne aıtyldy?

Almatydaǵy erekshe balalarǵa arnalǵan mektep 1 myń 200 adamǵa arnalǵan. Naýryzbaı aýdanyndaǵy ınklúzıvti bilim ordasy ázirge elimizde bireý ǵana. Ǵımarat tolyqtaı seısmoturaqty etip turǵyzylǵan. Sonymen qatar, ishindegi jıhazdary qabyrǵaǵa bekitilgen. Mundaı tájirıbe shetelden alynǵan eken. Jalpy Almatyda bilim salasyna 70 mıllıardtan astam qarajat jumsalmaq. Aıta keteıik, atalǵan salany qarjylandyrý sońǵy 5 jylda 40 paıyzǵa ósken.  

«Bıyl mektepterdiń qurylysy men jóndeý jumystaryna 17 mıllıard teńge bólindi. Osy kúni №26-shy mektepti jańartý jumystary aıaqtaldy. Sonymen qatar 90 adamǵa arnalǵan túzetý balabaqshasy ashyldy. Naýryzbaı aýdanyndaǵy jańa mektep seısmoqaýipsizdik talaptaryna saı. Mektep qurylysy taktıldi joldar, lıft, shaqyrý batyrmasy qoıylǵan arnaıy sanıtarlyq bólmelerden turady. Biz taýly aımaqta ómir súrgendikten seısmoturaqtylyq saýaly mazalaıdy. Mundaǵy jıhazdar qabyrǵaǵa bekitilgen. Bul tártipti barlyq bilim ornyna taratýǵa tıispiz. Biz halyqaralyq jetekshi elderdiń, onyń ishinde, Japonıanyń tájirıbesine súıenemiz. Tótenshe jaǵdaılar bola qalsa jıhazdar qulap, balalardyń syrtqa shyǵýyna kedergi jasaıdy», – dedi Almaty qalasynyń ákimi Baýyrjan Baıbek.

Bıyl megapolıstiń 4 mektebinde seısmokúsheıtý jumystary júrip jatyr. Almatyda 1 myń 134 bilim berý mekemesi bolsa, onyń 442-si memlekettik, al 692-si jekemenshik. Qalada 30 myńnan astam muǵalim qyzmet etedi eken. Shahardaǵy bilim berý mekemeleriniń 57 paıyzynda erekshe balalardyń oqýyna jaǵdaı jasalǵan. Almatyda bıyl 75 myńnan astam tálimger jańartylǵan bilim berý mazmunymen oqıtyn bolady deıdi Bilim basqarmasynyń basshysy.

«Ózderińizge málim bolǵandaı, jańartylǵan bilim berý mazmunyna 2016-shy jyldan beri 1, 2, 5, 7 synyp oqýshylary kóshken bolatyn. Al jańa oqý jylynda 3, 6, 8 synyptaǵy 75 myńnan asa bala zamanaýı oqý baǵdarlamalarymen oqıtyn bolady», – dedi Almaty qalasy Bilim basqarmasynyń basshysy Gúlnar Hodjabergenova.

Bıyl Almatyda 71 jekemenshik balabaqsha búldirshinderdi qabyldaǵan. Taǵy 2 myń orynǵa arnalǵan 9 mektepke deıingi mekeme salynyp jatyr. 4 memlekettik balabaqshanyń qurylysy aıaqtalýǵa jaqyn.

Tamyz keńesinde sondaı-aq, stýdentterdiń bilim berý júıesindegi ózgerister aıtyldy. Endi kolejderde modýldik baǵdarlama boıynsha bilim beriledi. Iaǵnı, 1 dıplom birneshe mamandyqqa jaramdy bolady. Sáıkesinshe, jumysqa turý múmkindigi artpaq.

«Joǵarǵy oqý ornynda bilim alý jeńildetildi. Endi stýdent bakalavr boıynsha bilimdi burynǵydaı 4 jylda emes, 3 nemese 2 jarym jylda alyp shyǵady. Barlyǵy óziniń qabiletine baılanysty. Mundaı sheshim sapaly kadrlar daıyndaýǵa septigin tıgizedi», – dedi QR Parlament májilisi tóraǵasynyń orynbasary Gúlmıra Isımbaeva.

Jıynda dástúr boıynsha úzdik ustazdar men mektep basshylary baǵaly syılyqtarmen marapattaldy. Sonymen qatar jańa oqý jylynan bastap biliktilikti arttyrý maqsatynda testileýden ótken 900 muǵalimniń jalaqylary 50 paıyzǵa deıin kóteriledi.