Almatyda kópten kútken baıraqty báseke – stýdentter arasynda fýtzaldan álem chempıonaty bastaldy. Bul saıysta álemniń 17 elinen kelgen komanda baq synamaq. Týrnırdiń saltanatty ashylý rásimine elimizdiń Bilim jáne ǵylym mınıstri, FISU halyqaralyq uıymynyń vıse-prezıdenti jáne Almaty qalasynyń ákimi qatysty.

Qazaqstanda sporttyń bul túrinen alǵash ret ótip jatqan álem chempıonatynyń alǵashqy oıyny Qazaqstan men Chehıa komandalary arasynda ótip, bizdiń sportshylar jeńiske jetti.

Bıylǵy álem birinshiligine 17 elden 25 komanda, 454 stýdent qatysyp otyr. 16 jyldan beri ótip kele jatqan báseke tarıhynda bıylǵy qatysýshylardyń sany rekordtyq mejege jetti deıdi Ulttyq stýdentter lıgasynyń prezıdenti.

«Bıyl, mine, rekord jasap otyrmyz. 450-den astam sportshy kelip, qatysyp jatyr. Bizdiń stýdentter qurama komandasy osal emes. Ábden iriktelip, tyńǵylyqty daıyndaldy. Endi júldeli oryndardan úmittimiz», – dedi Ulttyq stýdentter lıgasynyń prezıdenti Damır Shynybekov.

Baıraqty básekeniń resmı ashylý saltanaty «Almaty-Arena» kesheninde ótti. Ár nómiri qaıtalanbas qoıylymymen erekshelengen shoýǵa qazaq estradasynyń juldyzdary qatysty. Sharanyń basynda mánerlep syrǵanaýshy Denıs Tenniń qurmetine arnalǵan áserli bı qoıylymy kórsetildi.

Chempıonatty saltanatty túrde ashyq dep jarıalaǵan Almaty ákimi Baýyrjan Baıbek sportshylarǵa sáttilik tiledi. Al FISU uıymynyń vıse-prezıdenti Marıan Dymalskı Almaty sport jarystaryn únemi joǵary deıgeıde uıymdastyratynyn aıtyp, osy týrnırdiń de tamasha ótetinine senim bildirdi.

«Stýdentter arasynda fýtzaldan álem chempıonatynyń ashylýymen barshańyzdy shyn júrekten quttyqtaımyn! Álemniń 17 elinen kelip sportshylar saıysatyn bul chempıonatty ótkizý elimizdegi árbir 3-shi stýdent bilim alyp jatqan Almaty shahary úshin zańdylyq dep bilemiz. Qala halqynyń 40 paıyzynan astamyn jastar quraıdy. Sondyqtan da Almaty – jastar qalasy! FISU-dyń belsendi múshesi retinde biz sportty damytý, jastardy sportqa baýlý baǵytyndaǵy jumystardy jalǵastyra bermekpiz», – dedi Almaty qalasynyń ákimi Baýyrjan Baıbek.

«Men osy fýtzaldan stýdentter arasynda ótken kóptegen álem chempıonatyna bardym. Biraq dál búgingideı keremet áser alǵan emespin. Búgingi jarystyń ashylýy buryn-sońdy bolmaǵan desem artyq aıtqandyq emes. Aldaǵy týrnırdiń de joǵary deńgeıde ótetinine senemin», – dedi FISU vıse-prezıdenti Marıan Dymalskıı.

Chempıonattyń ashylý rásimi aıaqtala salysymen, Qazaqstan men Chehıa  quramalarynyń oıyny ótti. Oıyn alǵashqy mınýttan-aq tartysty bastaldy. Onyń bir dáleli retinde eki komandanyń da qaqpasyna bir-birden penaltı belgilenin aıtýǵa bolady. 12-shi mınýtta Aǵedil Madıarov alǵashqy goldy soqty. Artynsha Dáýren Tursaǵulov taǵy da qarsylas komandanyń qaqpasyn dál kózdep esepti eseleı tústi. Al chehıalyqtardan Pavel Drozd 1 gol salyp, birinshi taım 2:1 esebimen aıaqtaldy. Degenmen, qazaqstandyq sportshylarǵa belsendi qoldaý kórsetken jankúıerler bizdiń sańlaqtardyń jeńiske jetetinine senimdi boldy.

Qazaqstandyq komanda oıynyn tamashalaý úshin tek Almaty turǵyndary ǵana emes, elimizdiń túkpir-túkpirinen de jankúıerler arnaıy at sabyltyp kelgenin aıtyp ótken jóna ketý kerek. «Osy jarysty tamashalaý úshin Aqtóbe oblysynan otbasymmen kelip turmyn. Qazaqstan sportshylary jaqsy daıyndalǵan», – deıdi Qanat esimdi azamat.  

Ekinshi taımda da qos komandanyń oıynshylary jan berisip oınady. Qonaqtar da, qazaqstandyqtar da eki goldan saldy. Osylaısha, mach 4:3 esebimen bizdiń quramamyzdyń paıdasyna aıaqtaldy.

Aıta keteıik, álem chempıonaty 26-tamyzǵa deıin jalǵasady. Onda barlyǵy 17 elden jınalǵan 16 erler jáne 9 áıelder komandasy saıysady.