Almatylyqtar qasıetti Qurban aıt merekesine qyzý daıyndalyp jatyr. Turǵyndar búginnen bastap mal satyp alýǵa kirisken. Qalada qurbandyq shalatyn oryndar da belgilenip qoıypty. Jaratqanǵa jaqyndaıtyn meıramda qandaı mal soımaý kerek? Bazardaǵy baǵalar qandaı?

Naýryzbaı aýdanyndaǵy «Taý samal» bazaryna tańnan beri mal satyp alýǵa kelip jatqandardyń qarasy qalyń. Mundaǵy qoılardyń kóbisi Almaty oblysynan jetkizilgen. Barlyǵynyń qujattary túgel. Tekserýden ótken deıdi saýdagerler. Sonymen qatar arnaıy qasaphana da qarastyrylǵan.  

«Qoılardyń qujattarynyń bári bar. Bári zańdy. Tekserilgen. Osy jerdiń mal dárigeri bar. Ol aralap, árbir qoıdy tekserip shyǵady. Bári syrǵalanǵan. Báriniń qujattary durys. Qoıdyń baǵalary 18 myń ben 50 myń teńgeniń arasynda. Óte qymbat emes. Halyqqa qolaıly, jaǵymdy. Soıatyn jer bar. Qasaphana bar», – dedi saýdager Beısenbaı Nurǵısaev.

Qasıetti merekede qurbandyq shalyp, Jaratqannan saýap alýǵa asyǵatyndar semiz qoıdyń baǵasy asa arzan emes deıdi. Alaıda, saýdalasý súnnet bolǵandyqtan baǵasyn shamaly túsirip alyp jatqandar bar. Turǵyndar bazardaǵy maldyń qunyn eshkim qadaǵalamasa da, ornatylǵan baǵaǵa kóńilderiniń tolatynyn aıtady.  

Qasıetti merekede qurbandyq shalýǵa nıet bildirip, bazarda mal satyp alýǵa kelgenderdi sózge tartyp kórgenimizde, satyp alýshylardyń biri: «Qoıdyń baǵalaryn kelisip, azdap túsirip alýǵa bolady. Baǵany qatty kóterýge de bolmaıdy ǵoı. Degenmen, eki jaq ta razy bolýy kerek. Ol Paıǵambarymyzdyń súnneti. Máselen, men 40 myń teńgege baǵalanǵan qoıdy saýdagermen kelisip, 38 myńǵa aldym», dep aǵynan jarylsa, endi biri: «Men ózim satyp alǵan baǵaǵa óte rızamyn. Qoıdy 32 myń teńgege satyp aldym. Bordaqylanǵan, semiz qoı eken. Bárińizge Qurban aıt qutty bolsyn degim keledi!», dep rızashylyǵyn bildirdi.  

Bıyl Almatyda qurbandyq shalatyn arnaıy 22 oryn belgilenipti. Ár aýdanda kem degende 2 jerden bar. Qasaphanalar sanıtarlyq talaptarǵa tolyqtaı saı bolý kerek. Sondaı-aq, mal dárigeri de osynda bolý qajet. Eger ákimdik belgilegen orynnan tys jerde mal soıylsa, tártip buzǵan adam ákimshilik jaýapkershilikke tartylady.

Sharıǵat boıynsha qurbandyqqa qoı, eshki, túıe, sıyr soıýǵa ruqsat etilgen. Naqtysy, bir jasar qoı-eshki, eki jasar sıyr, bes jasar túıe shalynady. Soıylatyn mal aryq, aqsaq, soqyr, shunaq, múıizi synǵan bolmaýy tıis. Usaq maldyń saýaby bir otbasyǵa tıse, sıyr men túıeni 7 januıa qosylyp shalýyna bolady.

«Soıylǵan maldyń eti úshke bólinedi. Bir bóligi óz otbasymen jeıdi. Ekinshi bóligin týystaryna, kórshilerine beredi. Úshinshi bóligin jaǵdaıy tómen otbasylarǵa azamattarǵa tarqatyp, sadaqa retinde beredi. Biraq múmkinidiginshe, kóbirek bóligin sadaqa retinde taratqany abzal», – dedi Almaty qalasynyń bas ımamy Erkinbek Shoqaı.

Erteń aıt namazy Almatynyń ortalyq meshitinde tańǵy saǵat 7.00-de oqylady. Odan keıin qurbandyq mal shalynyp, meshittiń aýlasynda ulttyq oıyndardan jarys uıymdastyrylady.