Almatyda testilik tártipte jumysyn bastaǵan qoqys suryptaıtyn keshenniń táýliktik ónimdilik qýaty – 250 tonna. Búgingi kúni turmystyq qaldyqtar Medeý jáne Túrksib aýdandarynan qabyldanyp jatyr.

Búgin Parlament Májilisi tóraǵasynyń orynbasary Gúlmıra Isımbaeva keshendi aralap, keshen jumysymen tanysty. Qazir zaýytta eki jeli iske qosylǵan. Osy aptanyń aıaǵyna qaraı taǵy eki jeli qyzmetin bastamaq. Turmystyq qaldyqtardan shıkizat alý úshin qoqys suryptalady. Odan keıin óńdeýge jiberiledi.  

«Zaýyt qyrkúıek aıynda tolyq jumys isteıdi. Qazirgi kezde megapolıste jylyna 600 myń tonnaǵa jýyq qoqys jınalady, biz turmystyq qatqyl qaldyqtardy suryptaýda qalany tolyq qamtymaq oıdamyz. Keshen aýmaǵynda qoqys óńdeý zaýytyn salmaqpyz. Qazirgi tańda onyń óndiris qýaty qansha bolýy kerek ekenin eseptep jatyrmyz», – dedi ınvestısıalyq kompanıa dırektory Dmıtrıı Danılchenko.

Keshenniń jyldyq ónimdilik qýaty 550 myń tonna. Qalanyń ekologıalyq ahýalyn jaqsartýǵa arnalǵan joba quny 5 jarym mıllıard teńge. Zaýyt tolyq iske qosylǵan soń, 500-den astam adam jumyspen qamtylatyn bolady.