Fýtzaldan stýdentter arasyndaǵy dodada 500-ge jýyq sportshy baq synaıdy. Shaǵyn fýtbol tarıhynda mundaı kórsetkish buryn-sońdy bolmaǵan eken.

Aıta ketsek, stýdentter arasynda aıaq doptan alǵashqy chempıonat 1984 jyly Brazılıada ótken. Keıinnen Portýgalıa, Ispanıa, Italıa syndy álemniń alpaýyt elderinde jalǵasyn taýyp, keńinen tanyla bastady. Al Qazaqstan stýdentter quramasy Chempıonatqa 2006 jyldan bastap qatysa bastady. Endi bul halyqaralyq jarystyń bizdiń elde ǵana emes, jalpy TMD aýmaǵynda tuńǵysh ret ótkeni –  úlken jetistik deıdi sala mamandary.

«Qysqy Ýnıversıada oıyndarynan soń sizderde keremet mura qaldy. Ol birinen-biri asatyn, óte sapaly sport nysandary. Jalpy, Almaty óte yńǵaıly jerde ornalasqan. Saıysqa Eýropa men Azıa elderiniń komandalary da kedergisiz kele alady. Sondyqtan bıylǵy jarysqa qatysýshylar sany rekordtyq kórsetkishke jetip otyr. Menińshe, Almatynyń osy chempıonat syndy baıraqty básekelerdi óte joǵarǵy deńgeıde ótkizýine barlyq múmkindigi bar», – dedi «FISU» baqylaý komısıasynyń jetekshisi Dmıtrıı Kısılev.

«Almaty byltyr Qysqy stýdentter oıynyn ótkizip, mol tájirıbe jınady. Medısınalyq ınfraqurylymdy damytyp, dopıngke qarsy júıe qurdy. Qaladaǵy sport nysandary, dopıng beketter, medısınalyq pýnktter chempıonatty joǵary deńgeıde ótkizýge ábden laıyq. Eń bastysy, munda tájirıbeli, myqty medısına salasynyń qyzmetkerleri bar», – dedi «FISU» halyqaralyq medısınalyq komısıasynyń jetekshisi Marat Gataýlın.

Baıraqty básekege 17 eldiń stýdentter quramasy qatysyp otyr. Olardyń ishinde, Argentına, Chehıa, Portýgalıa jáne Germanıa syndy myqty komandalar bar. Álemniń ár túkpirinen kelgen sportshylardyń barlyǵy «Qazaqstan» qonaqúıine jaıǵasty. Qazaq jerin alǵash kórgen sheteldik qonaqtar óz áserlerimen bylaı bólisti.

«Almatyǵa alǵash ret keldim, qala óte unady. Ásirese, adamdary qonaqjaı, meıirimdi eken. Qazaqstan týraly buryn Pavel Taký esimdi dosymnan estidim. Ol osynda týyp ósken, qazir Fransıanyń bir fýtbol komandasynda oınaıdy. Al sizderdiń chempıonatty ótkizý deńgeılerińiz kóńilimnen shyqty. Bul jarysqa 3-shi ret qatysýym. Biraq mundaı deńgeıdegi saıysty kórmedim. Ásirese, barlyq qatysýshylardy bir qonaqúıge ornalastyrǵany óte jaqsy boldy. Bir-birimizben jaqyn tanysyp, dostasyp jatyrmyz», – dedi fýtzaldan Fransıa quramasynyń oıynshysy Mýhıdın Sýhel.

«Bul meniń Qazaqstanǵa alǵash kelýim. Bul elden alǵan áserimdi sózben jetkizý múmkin emes. Qala erekshe, jasyl eken. Tabıǵaty da keremet. Ásirese, kóz tartar taýlaryńyz unady. Buryn qymyz týraly kóp estıtinmin, taýdan qymyz dámin tatyp kórdim», – dedi fýtzaldan Jańa Zelandıa quramasynyń oıynshysy Deına Menek.

«Men bul chempıonatqa birinshi ret qatysyp otyrmyn jáne sonyń arqasynda birinshi ret Almatyny kórdim. Qala óte unady, turǵyndary qonaqjaı eken. Kómek surasań qol ushyn sozýǵa daıyn turady. Ásirese, bizdiń janymyzda júrgen volonterlerge rahmet! Osynshama kóp volonterdi buryn-sońdy kórmeppin», – dedi fýtzaldan Kanada quramasynyń oıynshysy Larısa Ýaıt.