Almaty avtobýstaryna kóshedegi jaǵdaıdy túsirip alý úshin vıdeokameralar ornatylady. Bul týraly brıfıńte qalalyq ishki ister departamentiniń ókili aıtty.

Birinshi kezeńde kamera 30-dan 50-ge deıin avtobýstardy túsirip almaq.

Almaty İİD ákimshilik polısıasy basqarmasynyń basshysy Jandos Murtálıevtiń sózinshe, bastapqy kezeń 2018 jyldyń sońyna deıin júzege asady.

«Ázirge marshrýttardyń naqty nómirleri anyqtalǵan joq, bolashaqta belgilengen jolmen júretin avtobýs baǵyttary nazarǵa alynbaq. Olar basqa júrgizýshilerdiń zań buzýshylyqtaryn túsirip alyp qana qoımaı, avtobýstardy da túsiredi», – deıdi Murtálıev.

Aıta keteıik, Almatyda taksı júrgizýshileri men basqa da transport júrgizýshilerine túnde qoǵamdyq kólik jolaǵymen júrýge ruqsat berilýi múmkin.