Almatyda Qala kúni keń kólemde atalyp ótpek. Arý qalanyń 1002 jyldyǵyna oraı 100-den astam is-shara ótedi. Onyń 50-den astamy – mádenı sharalar. Túrli festıvál, kórme konsertterge tek otandyq qana emes, sheteldik óner maıtalmandary men sýretshiler de arnaıy kelmek. Sonyń ishinde, «ARTBAT fest» festıvali 24 tamyzda bastalady.

Almatyda halyqaralyq «ARTBAT fest» óner festıvali toǵyzynshy ret shymyldyǵyn túrmek. Pablık-art jobasy halyqaralyq eýropalyq baǵdarlamaǵa endi. Oǵan Fransıa sáýletshisi Sımon Jakmın jáne slovenıalyq sýretshi Martın Brısel Baraga jetekshilik etpek. Bıylǵy festıvál taqyryby – «Sý aǵyny». Kóptegen ınstallásıa tirshilik nárimen baılanysty jasalady. Óz jumystaryn otandyq sýretshiler ǵana emes, Slovenıa, Italıa, Fransıa, Germanıa, Ulybrıtanıa jáne Japonıadan kelgen sýretshiler de usynady.

«ARTBAT Fest» tek pablık-art qana emes, onyń aıasynda kórme, oqytý alańdary da jumys isteıdi. Mamyr aıynan bastap kórkem ym mektebi qyzmet etedi. Sonymen qatar, Reseı, Úndistan, Ázirbaıjan, Shveısarıadan kelgen sýretshilerdiӊ kórmesin ótkizý josparlanyp otyr. Qazirgi kezde «Zamanaýı almatylyqtyӊ portreti» atty kórkemdik zertteý júrgizilýde. Onyń nátıjesi festıválde kórsetiledi. Sondaı-aq Belarýs pen Armenıa sýretshileri kelip, festıválge óz jumystaryn usynady», – dedi «ARTBAT fest» festıvaliniń dırektory Olga Veselova.

Álemniń túkpir-túkpirinen kelgen óner ıeleriniń qatysýymen sımpozıým ótkizilmek. Dástúrli shara 2010 jyldan beri turaqty túrde uıymdastyrylyp keledi. Osy ýaqyt aralyǵynda oǵan 20-dan asa memleketten kelgen sýretshi jáne kýratorlar qatysyp, 300-den astam zamanaýı týyndy usynǵan.

Qala turǵyndaryn sózge tartyp kórgenimizde, kópshiligi Qala kúnin asyǵa kútip júrgenderin aıtty. Máselen, myna turǵyn: «Konserterin, jármeńkelerin kóremiz. Jyldaǵydaı bolady dep oılaımyn. Qalamyz kórkeıe bersin», – dese, al kelesi bir turǵyn: «Qala kúnin kútip júrmiz. Qyzyqty shoýlar, myqty otshashýlar bolady dep úmittenemiz», – dedi kóterińki kóńil kúımen.

Qala kúninde 100-den asa is-shara ótkizilmek. Onyń ishinde, «Kóktóbe opera», «Orkestrler sherýi» ıaǵnı, ashyq aspan astyndaǵy orkestr mýzykasynyń festıvali qalyń jurttyń kóńilin kótermek. Budan ózge, Otbasy festıvali jáne «Almaty garden show» baý-baqsha halyqaralyq festıvali uıymdastyrylady.