Almatyda ótip jatqan fýtzaldan stýdentter arasyndaǵy álem chempıonatynyń qatysýshylary búgin sheberlik sabaǵyn ótkizdi. Qazaqstan, Kanada, Argentına, Ýkraına jáne Germanıa eliniń sportshylary qalanyń birneshe jerinde óz sheberlikterimen bólisti.

Oıynshylar drıblıng jasaý, durys pas berý, jalpy fýtzaldyń erekshelikterin búldirshinderge kórsetti.

№1 balalar úıiniń búldirshinderi Kanada men Ýkraına aıaqdopshylaryn qýana qarsy aldy. Sportshylar alańǵa kire salyp, birden jattyǵýdy bastap ketti. Fýtzal sheberleri balalarǵa pas berý, drıblıng jasaý, qaqpaǵa dál soqqy jasaý sekildi ádisterdi úıretti.    

«Almatydaǵy fýtbol alańdary óte sapaly eken. Keń ári jańa. Qonaqjaılylyqtaryńyzǵa tánti boldym. Búldirshinderdiń fýtbolǵa degen qyzyǵýshylyǵy joǵary. Bizdiń komandanyń sportshylary bar bilgenin úıretip qalýǵa tyrysyp jatyr. Bir kúndik demalysta sheberlik sabaqtaryn ótkizgen uıymdastyrýshylarǵa rahmet», – dedi fýtzaldan áıelder komandasynyń jattyqtyrýshysy (Kanada) Aleksandr Drosha.

«Sport meniń aýlamda» baǵdarlamasy aıasynda uıymdastyrylǵan shara jetkinshekterdiń fýtzalǵa qyzyǵýshylyqtaryn arttyrady deıdi stýdentter lıgasynyń prezıdenti Damır Shynybekov.  

«Mundaı sheberlik sabaqtary balalardyń motıvasıa alýyna septigin tıgizedi. Sonymen qatar, osy sport túrine degen qyzyǵýshylyqtaryn arttyrady. Almaty qalasynyń turǵyndary men qonaqtaryn jarysty tamashalaýǵa shaqyramyn», – dedi Ulttyq stýdentter lıgasynyń prezıdenti Damır Shynybekov.

Argentına quramasynyń fýtbolshylary «Juldyz» shaǵyn aýdanyndaǵy alańda sheberlikterimen bólisti. Mundaǵy jetkinshekter Messıdiń jerlesterin taǵatsyzdana kútkenin aıtady. Balalar aıaqdopshylardan qoltańba alyp, birge sýretke tústi. Aralarynda syılyqqa dop alǵandar da boldy.

Sheberlik sabaǵyn kórýge kelgen qonaqtardy sózge tartqanymyzda, olardyń biri: «Osy «Sport meniń aýlamda» baǵdarlamasynyń aıasynda balalardy jınap, sol komandalardan sheberlik saǵattatyn kútýdemiz», – dese, endi biri: «Jattyǵýlar jasap, ózimizdi jattyqtyryp, bolashaqta sportshy bolýǵa daıyndyq júrgizip jatyrmyz», – dep jaýap berdi.

Eske sala ketsek, Almatyda stýdentter arasynda fýtzaldan álem chempıonaty ótýde. Baıraqty básekege 16 erler men 9 áıelder jandylar komandasy qatysýda. Qazaqstan quramasy pleı-off kezeńine toptan 1-shi orynmen shyqty. Dúbirli doda «Almaty Arena» jáne «Halyq Arena» sport keshenderinde ótýde.