Avstrıanyń Alpbahynda úkimet basyndaǵy jáne burynǵy memleket, úkimet basshylary, halyqaralyq uıymdar men BAQ ókilderiniń qatysýymen joǵarǵy deńgeıdegi jyl saıynǵy bedeldi saıası forým bolyp ótti dep habarlaıdy Qamshy.kz aqparat agenttigi QazUÝ-dyń Baspasóz qyzmetine silteme jasaı otyryp. Eýropalyq jáne jahandyq máselelerdiń sheshimin tabýǵa arnalǵan bul shara óz alańynda álemniń 100 memleketinen kelgen 5 myń qatysýshylardyń basyn qosty.
Avstrıanyń prezıdenti Aleksandr Van der Bellen, BUU-nyń segizinshi Bas hatshysy Pan Gı Mýn, Avstrıanyń burynǵy prezıdenti Haıns Fısher, Serbıanyń premer-mınıstri Aleksandr Výchıch jáne taǵy basqalar sımpozıýmnyń basty spıkerleri bolyp tabyldy jáne olar ǵalamdyq tektonıkalyq saıası-ekonomıkalyq ózgerister konteksinde forýmnyń ózektiligin atap ótti.
Ál-Farabı atyndaǵy QazUÝ jáne jaqynda onyń janynda qurylǵan Pan Gı Mýn atyndaǵy turaqty damý ınstıtýty atalmysh sharaǵa BUU-nyń jahandyq azamattyq jáne turaqty damý baǵytyndaǵy bastamalaryn júzege asyrý boıynsha yntymaqtastyqtyń perspektıvalaryn talqylaý maqsatynda shaqyryldy.
QazUÝ «BUU-nyń «Akademıalyq yqpal» jahandyq habyn 2014 jyldan beri basqaryp keledi jáne baǵdarlamanyń mańyzdy qaǵıdalaryn iske asyrýda halyqaralyq deńgeıde tanymal kósbasshy bolyp tabylady.
Ál-Farabı atyndaǵy QazUÝ-dyń rektory, akademık Ǵalym Mutanovtyń «Ýnıversıtet 4.0 - joǵary bilim berýdegi jańa kezeń» atty baıandamasy forým qatysýshylarynyń erekshe qyzyǵýshylyǵyn týdyrdy. Atalmysh bastama buǵan deıin BUU-nyń Nú-Iorktegi shtab-páterinde mamyr aıynda ótkizilgen konferensıa barysynda alǵash ret usynylǵan bolatyn. Osy qyzmettegi aıqyn baǵyt-baǵdar memlekettik baǵdarlama «Bolashaqqa baǵdar: qoǵamdyq sanany jańǵyrtý» bolyp tabylady.
Jańa ýnıversıtet modeliniń mısıasy jastardy boıynda álemdik joǵary rýhanı-adamgershilik qasıetteri men belsendi azamattyq ustanymy bar izgilikti azamat retinde qalyptastyrý. Forýmǵa qatysýshylardyń atap ótkenindeı, «Ýnıversıtet 4.0» jańa modeli jahandaný jaǵdaıynda, sondaı-aq jańa tehnologıalardyń qarqyndy damýy kezeńinde erekshe mańyzdy.
Qazaqstandyq joǵary oqý ornynyń forýmǵa qatysýynyń basty nátıjesi Ǵalamdyq azamattyq ortalyǵy (Avstrıa), Turaqty damý ınstıtýty (Ońtústik Koreıa) jáne ál-Farabı atyndaǵy QazUÝ arasynda Strategıalyq seriktestik týraly kelisimge qol qoıý bolyp tabyldy. Qujatty Avstrıanyń eks-prezıdenti Haıns Fısher, BUU-nyń segizinshi Bas hatshysy Pan Gı Mýn jáne QazUÝ rektory Ǵalym Mutanov (Qazaqstan) qoldaryn qoıyp bekitti. Kelisimshart adamzattyń jahandyq máseleleri men qazirgi zamannyń syn-tegeýrinderin sheshýde taraptardyń kúsh-jigerin biriktirýge múmkindik beredi.
