Almaty álemdik dúbirli dodany qabyldaýǵa daıyndyq ústinde. Sanaýly kúnderden keıin qalada stýdentter arasynda fýtzaldan álem chempıonaty ótedi. Jarysqa shartaraptan kelgen eń myqty 17 erler jáne áıelder komandasy qatysady. Olardyń arasynda Kanada, Germanıa, Fransıa, Argentına jáne taǵy basqa eldiń sportshylary bar.
Stýdentter arasynda fýtzaldan álem chempıonatynyń ashylý saltanaty dál osy Almaty Arena kópsalaly muz saraıynda ótedi. Alǵashqy jarysty da osy keshende tamashalaýǵa bolady. Eń birinshi Qazaqstan jáne Chehıa eliniń erler quramasy saıysqa túsedi. Muz saraıy sońǵy daıyndyqtaryn pysyqtaýda. Mamandar jaryqty tekserip, parketti qoıyp jatyr. Sonymen qatar, Halyk Arena sport kesheninde de jarys bolady.
«Osy fýtzaldan álemdik chempıonat bizdiń tarıhymyzda, TMD elderi tarıhynda alǵashqy ret bolady. Bul óte dárejeli, óte kúrdeli chempıonat dep aıtýǵa bolady. Sebebi, FIFA álemdik fýtbol qaýymdastyǵy bul chempıonatty reıtıń boıynsha sanaıdy. Sondyqtan, barlyq quramalar eń úzdik oıyndar kórsetýge tyrysady», – dedi Ulttyq stýdentter lıgasynyń prezıdenti Damır Shynybekov.
Bul dúbirli doda bizdiń elde ǵana emes, jalpy TMD aýmaǵynda tuńǵysh ret ótkeli otyr. Baıraqty básekege 17 eldiń stýdentter quramasy qatysady. Onyń ishinde, Argentına, Chehıa, Portýgalıa jáne Germanıa syndy myqty komandalar bar. Erler saıysynda Qazaqstan «V» tobynda óner kórsetedi. Qyzdar da osy topta saıysady. Bozbalalardyń toptyq týrnırdegi qarsylastary – Chehıa, Belarýs jáne Jańa Zelandıa quramalary. Al bizdiń burymdylar – Portýgalıa, Fransıa jáne Jańa Zelandıanyń sportshylarymen oınaıdy.
«Qazirgi komandalardyń bári óte úlken dárejeli oıynshylar. Ár memlekette chempıonattar ótedi. Sol jaqtan irikteýler júredi. Ózimizdegi sıaqty. Qazirgi bizdiń birinshi grýppamyzdaǵy komandalar Chehıa, Belorýssıa, Jańa Zelandıa memleketterinen keldi. Bizdiń oıynshylarymyzdyń barlyǵy 23 pen 19 jas arasyndaǵy endi shyǵyp jatqan, endi kórinip jatqan jas balalar», – dedi fýtzaldan Qazaqstan erler quramasynyń bapkeri Qaırat Qulbaraqov.
Dúbirli doda uıymdastyrýshylary Germanıa, Kanada, Qytaı sportshylaryn áýejaıdan kútip aldy. Álemniń túkpir-túkpirinen jınalǵan aıaqdopshylar Almatyda bir apta boıy kil myqtydan kim myqtyny anyqtaıdy. Fınal 26 tamyz kúni Almaty arena kesheninde ótedi dep josparlanǵan.
