Almatynyń týǵan kúnin merekeleý 25 tamyzda bastalady. Qala kúni qarsańynda alǵashqy shara – ashyq aspan astynda ótetin dástúrli «Almaty Kóktóbe Opera–2018» mýzyka festıvali.

Almaty qalasy Mádenıet jáne arhıvter basqarmasynyń habarlaýynsha, bul Qazaqstannyń ońtústik astanasy úshin asa mańyzdy ári halyq saǵyna kútetin sharanyń biri. Atalmysh festıválde turǵyndar men qala qonaqtary qazaqstandyq jáne sheteldik opera juldyzdarynyń tamasha daýysyn tyńdap, álemdik balet nómirlerin tamashalaı alady.

Bıylǵy «Kóktóbe Opera–2018» festıvalinde ıtalıalyq tenor, «Opernyı Oskar» júldesiniń ıegeri Vınchenso Konstansa óner kórsetip, klasıkalyq mýzyka tyńdarmandaryn qýantpaq. Sonymen qatar, Abaı atyndaǵy Qazaq memlekettik akademıalyq opera jáne balet teatrynyń sımfonıalyq orkestri álemdik klasıkalyq shedevrlerdi oryndaıdy.  

«Baǵdarlamaǵa sımfonıalyq orkestr, hor jáne balet qatysady. Baǵdarlama eki kún boıy, 25-26-tamyz kúnderi Kóktóbe saıabaǵynda keshki saǵat 20.00-de bastalady. Ashyq aspan astynda bolǵandyqtan, mýzyka ónerinen lázzat alam deýshiler kelip tamashalaı alady», – dedi Almaty qalasy Mádenıet jáne arhıvter basqarmasynyń bólim basshysy Aınur Bajenova.

Qala kúnin merekeleý kezinde Almatyda júzden asa is-shara ótedi. Baǵdarlama aıasynda «ARTBAT fest» zamanaýı ónerdiń halyqaralyq festıvali, «Orkestrler sherýi» ıaǵnı, ashyq aspan astyndaǵy orkestr mýzykasynyń festıvali qalyń jurttyń kóńilin kótermek. Budan ózge, Otbasy festıvali jáne «Almaty garden show» baý-baqsha halyqaralyq festıvali uıymdastyrylady.

Jyl saıyn Qala kúni qarsańynda paıdaly jármeńkelerdi aralap, qyzyqty konsertterdi qalt jibermeıtin turǵyndar bıyl da bul merekeniń joǵary deńgeıde toılanatynynan úmitti.  

Ońtústik astanamyzdyń týǵan kúni aıasynda kilem buıymdarynyń jármeńke-kórmesin ótkizý josparlanyp otyr. Sondaı-aq, Qala kúni qarsańynda Alataý aýdanynyń 10-jyldyǵy atalyp ótedi. Uıymdastyrýshylar megapolıste ótetin bıylǵy mereke burynǵydan ózgerek bolady deıdi.