Almatyda 11-shi jedel medısınalyq kómek kórsetetin qosalqy stansıa ashyldy. Kólemi 1 myń sharshy metrdi quraıtyn eki qabatty ǵımarat jergilikti búdjettiń qarjysyna boı kótergen.

Naýryzbaı aýdanynyń «Shuǵyla» eldi mekeninde salynǵan qosalqy stansıada 20 shaqty kólikke arnalǵan turaq bar. Onda shaqyrtýlarǵa tez jetý úshin 14 brıgada kúndiz-túni tynbaı jumys isteıdi. Jańadan ashylǵan jedel járdem bólimshesinde 9 feldsher, 20 shaqty dáriger jáne 78 medısınalyq qyzmetker bar.  

«Sońǵy jylda qalamyzdyń úlkeıip, jańa aýdandardyń ashylýyna baılanysty jańa qosalqy stansıalardyń ashylýyna kerek jaǵdaı týdy. Sol sebepti, Naýryzbaı aýdanynyń ákimshiliginen 489 mıllıon teńge qarajat bólinip, osy qosalqy stansıa salyndy. Ol 70 sotyq aýmaqta ornalasqan», – dedi Almaty qalasy Medısınalyq jedel járdem stansıasynyń bas dárigeri Sábıt Pazylov.

Aıta keteıik, 90 jyldyq tarıhy bar «103» qyzmetinde jalpy, 177 brıgada jáne 2 myńnan asa medısınalyq qyzmetker halyqqa alǵashqy kómek kórsetedi. Aıtýlarynsha, jedel járdemge kúnine shamamen, 3000-ǵa jýyq habar túsedi eken.