Almaty qalalyq İİD qyzmetkerleri er adamdy qaǵyp ketip, oqıǵa ornynan qashyp ketken kólik júrgizýshisin tapty, dep habarlaıdy Qamshy.kz aqparat agenttigi Almaty qalalyq İİD-niń baspasóz qyzmetine silteme jasap.
«1994 jylǵy G. esimdi azamat 1963 jylǵy er adamdy qaǵyp ketken. Ol alǵan jaraqatynan oqıǵa ornynda kóz jumdy. Leksýs 330 júrgizýshisi er adamǵa kómektespeı, qashyp ketken. Beıne baqylaý kameralary tekserilgennen keıin qaqqan kólik anyqtaldy. Odan keıin júrgizýshiniń kim ekeni belgili boldy. Ol Almaty oblysynyń turǵyny. Júrgizýshi ustaldy. Onyń kóligi qylmystyq iske kiristirildi», - deıdi Almaty qalalyq İİD-niń izdestirý bóliminiń basshysy Erik Nasyrbekov.
Polısıanyń málimetine sáıkes, júrgizýshi byltyr kólikti mas kúıinde aıdaǵany úshin ustalǵan.
«Qazir sotqa deıingi tekserý jumystary eki qylmys boıynsha qaralyp jatyr. Er adamdy oqıǵa ornynda qaldyryp ketý de qylmystyq jaýapkershilikti talap etedi. Qazir ustalǵan júrgizýshi túsinikteme berip jatyr» deıdi podpolkovnık Nasyrbekov.
