Almaty ákimi Baýyrjan Baıbek Ortalyq mádenıet jáne demalys saıabaǵyndaǵy jóndeý jumystarynyń qarqynyn tekserdi. Almatyda jalpy qalany rekonstrýksıalaýǵa bılik tarapynan qoldaý kórsetý aıasynda saıabaqtyń basqarýshy kompanıasy jańa sýburqaqtar, balalar men sport alańdaryn salýda. Jeke qarjydan barlyǵy 1,6 mlrd teńge ınvestısıa retinde jumsalýda.

Qazirgi kezde Ortalyq mádenıet jáne demalys saıabaǵy aınalasyna jańadan 182 jaryq dińgekteri ornatylǵan, troýtarlarǵa kespe tastar tóselip, jasyl aımaq keńeıtilgen.

Saıabaq aýmaǵy birneshe taqyryptyq aımaqtarǵa bólingen. Saıabaq ortalyǵynda buryn avtokólik turaǵy bolǵan edi, qazir munda skeıtodrom men rollerdrom, strıt-vorkaýt, tenıs korty, basketbol jáne balalar alańdary jumys jasýda.

Burynan bar sýburqaqtardy qalpyna keltirý jáne jańasyn salý jumystaryna erekshe nazar aýdarylǵan. Mysaly, 10 jyldan astam boıy tekke turǵan sýburqaqty qalpyna keltirý jumystary aıaqtalyp qaldy. Jazǵy sahnanyń shyǵys jaǵyna evropalyq qondyrǵylardy qoldana otyryp qurǵaq sýburqaq salynýda.

Barlyq negizgi jumystar bıylǵy jyldyń qazan aıyna deıin aıaqtalady. Bulardan ózge, basqarýshy kompanıa jańa jáne zamanýı atraksıondardy satyp alady.

Aıta keterligi, Almatyda qalanyń tarıhı ortalyǵyn rekonstrýksıalaý odan ári jalǵasýda.

Ótken jyly qala bıligi Panfılov, Jibek joly, Gogol, Qabanbaı batyr, Tólebaev, Baıseıitov kósheleri men «Astana» alańyn qaıta jańyǵrtqan bolatyn.

Al bıyl Abaı, Abylaı han, Dostyq, Nazarbaev, Jeltoqsan dańǵyldary, «Almaty 2» temirjol vokzalynyń aınalasy jáne Respýblıka Saraıy aldyndaǵy alań jóndelýde.

Qalada uzyndyǵy 500 km bolatyn 524 kóshe jóndeldi. Barlyǵy 3787 Almaty aýlalarynyń 1400–i abattandyryldy. 800 km ınjenerlik jeliler jóndeldi jáne salyndy. Qalada 300 km aryq jelisi jańardy. Qalanyń barlyq ótpeli joldary tolyq jóndeýden ótti.